اسلام آباد(این این آئی)متحدہ اپوزیشن نے پاناما لیکس کے ٹی او آرز پر حکومت کو ٹف ٹائم دینے کا فیصلہ کیا ہے جبکہ سینٹ میں قائد حزب اختلاف اعتزاز احسن نے کہاہے کہ حکومتی ٹیم شریف خاندان کو بچانے کی کوشش کررہی ہے۔ ذرائع کے مطابق اسلام آباد میں سینیٹ میں قائد حزب اختلاف اعتزاز احسن کی رہائش گاہ پر اپوزیشن کی ٹی اوآر کمیٹی کا اجلاس ہوا جس میں اپوزیشن نے حکومتی ٹی او آرز پر مشاورت مکمل کی۔ ذرائع کے مطابق اپوزیشن نے ڈیڈ لاک ختم نہ ہونے پر حکومت کو ٹف ٹائم دینے کا فیصلہ کرتے ہوئے قومی اسمبلی اجلاس کے بائیکاٹ کی تجویز پرغور شروع کردیا ۔متحدہ اپوزیشن کے اجلاس کے بعد میڈیا سے بات کرتے ہوئے سینیٹر اعتزاز احسن نے کہا کہ اجلاس میں حکومت کے دیئے گئے 4 ٹی او آرز پر غور کیا گیا، ان کا جواب منگل کے اجلاس میں دیں گے ہم حکومت کو قابل عمل تجاویز دیں گے۔ انہوں نے کہا کہ حکومت کی کوشش نوازشریف اور ان کے خاندان کو بچانا ہے لیکن اب اس معاملے کو طول نہیں دیا جاسکتا جب کہ اپوزیشن صدق دل سے مذاکرات چاہتی ہے۔ اعتزاز احسن نے کہا کہ لگتا ہے حکومت ہر صورت وزیر اعظم اور ان کے خاندان کو بچانا چاہتے ہے۔ شاہ محمود قریشی نے کہا کہ حکومت کے درست موقف کو تسلیم کریں گے۔ چاہتے ہیں بلا تفریق احتساب ہو۔ اپوزیشن رہنماؤں نے کہا کہ تحقیقات کا آغاز ہر صورت وزیراعظم اور انکے اہل خانہ سے ہی ہونا چاہیے۔ میڈیا سے بات کرتے ہوئے پارلیمنٹ میں قائد حزب اختلاف سید خورشید نے کہاکہ پاناما لیکس کی تحقیقات کے لیے ٹی او آرز پر حکومت اور اپوزیشن کے درمیان ڈیڈ لاک موجود ہے، اس میں بھی حکومت لچک نہیں دکھارہی، ایسا کرکے حکومت غلطی کررہی ہے، پانی سر سے گزر جانے کے بعد حکومت کو اپنی غلطی کا احساس ہوتا ہے، حکومت ایک قدم پیچھے آئے اور اپوزیشن کو سڑکوں پر دھکیلنے سے باز رہے کیونکہ اب ہمارے پاس سڑکوں پر جانے کا آخری راستہ بچا ہے۔