کراچی (این این آئی) وزیرا علیٰ سندھ سید قائم علی شاہ نے کہا ہے کہ سندھ کی تقسیم کسی صورت میں برداشت نہیں کریں گے ۔سندھ نے پاکستان بنایا اس کو تقسیم کرنے کی بات کرنا ملک دشمنی ہے ۔کراچی کے ترقیاتی کاموں کے لیے 22کروڑ روپے جاری کردیے ہیں ۔کچھ لوگ پانی کے مسئلے پر سیاست کرنا چاہتے ہیں ۔ہم پہلے کام کرتے ہیں اور پھر بتاتے ہیں ۔ان خیالات کا اظہار انہوں نے پیر کو ہاکس بے کے علاقے میں یونس آباد پل کا سنگ بنیاد رکھنے کی تقریب سے خطاب اور میڈیا سے بات چیت کرتے ہوئے کیا ۔سید قائم علی شاہ نے کہا کہ بلدیہ عظمی کراچی اب بہتر انداز میں کام کررہی ہے ۔کے ایم سی والے اب مقررہ وقت سے پہلے کام کرتے ہیں۔ہم نے کراچی کے ترقیاتی کاموں کے لئے 22کروڑ جاری کیے ہیں ۔انہوں نے کہا کہ یونس آباد پل چند ماہ میں مکمل ہو جائے گا۔پل یونس آباد کو ماڈی پور سے ملائے گا۔پل کی تعمیر پر 20کروڑ روپے خرچ ہوں گے ۔انہوں نے کہا کہ ہم پہلے کام کرتے ہیں اور بعد میں بتاتے ہیں۔ہماری کوشش ہے کراچی کو بہترین شہر بنایا جائے ۔عوام حکومت سے اچھی توقع رکھے۔وزیراعلیٰ سندھ نے کہا کہ کچھ لوگ پانی کے مسئلے پر سیاست کرنا چاہتے ہیں ۔پانی اور بجلی پر سیاست کرنا ٹھیک نہیں ہے ۔وزیراعلیٰ سندھ نے کہا کہ ہمیں سندھ کی تقسیم کسی صورت میں برداشت نہیں ہے ۔سندھ نے پاکستان بنایا۔ اس کو تقسیم کرنے کی بات کرنا ملک دشمنی ہے،جو سندھ کو تقسیم کرنے کی بات کرتے ہیں وہ پاکستان کو تقسیم کرنے کی بات کررہے ہیں ۔سندھ کی وحدت پر آنچ نہیں آنے دیں گے ۔انہوں نے کہا کہ غریب آدمی کو پانی کی زیادہ ضرورت ہے ۔پانی اور بجلی کے مسئلے پر ہمیں بھی تشویش ہے ۔ان دونوں اہم مسائل کے حل کے لیے سندھ حکومت عملی اقدامات کررہی ہے ۔ایک سوال کے جواب میں انہوں نے کہا کہ کمشنر کراچی کی تبدیلی معمول کا عمل ہے ،اسے ایشو نہ بنایا جائے ۔بعد ازاں وزیراعلیٰ نے منوڑا میں آر او پلانٹ کا افتتاح کیا ۔