لاہور( آن لائن )ڈی جی نیب کراچی، لاہور، پشاور، اور ڈی جی بلوچستان کی مبینہ طور پر غیر قانونی تعیناتیوں کے خلاف لاہور ہائیکورٹ میں درخواست دائر کردی گئی ہے۔ میڈیا کو موصول ہونے والی خصوصی دستاویزات کے مطابق ڈی جی نیب کراچی کرنل ریٹائرڈ سراج النسیم، ڈی جی نیب بلوچستان میجر ریٹائرڈ طارق محمود ملک، ڈی جی نیب لاہور میجرریٹائرڈ سید برہان علی اور ڈی جی نیب پشاور میجر ریٹائرڈ شہزاد سلیم کی تعیناتی نیب کے قانون کی خلاف ورزی ہے، جبکہ ٹرمز اینڈ کنڈیشنز آف نیب دو ہزار دو کی سیکشن تین سو چھتیس کے مطابق کسی بھی عہدے پر چھ ماہ سے زائد کرنٹ چارج پر تعیناتی نہیں کی جاسکتی۔ذرائع کے مطابق سابق چیئرمین نیب ایڈمرل ریٹائرڈ فصیح بخاری نے نیشنل مینجمنٹ کورس اور انیس سکیل میں مدت مکمل نہ کرنے پر نیب کی سلیکشن بورڈ میٹنگ دو ہزار تیرہ میں مذکورہ ڈی جیز کی پروموشن روکی دی تھی۔ درخواست گزار کی جانب سے عدالت سے استدعا کی گئی ہے کہ غیر قانونی طور پر تعینات ہونے والے ڈی جیز کو کام کرنے سے روکا جائے، اور غیر قانونی تعیناتیوں میں ملوث چیئرمین نیب کے خلاف انکوائری کا حکم بھی دیا جائے۔