مردان (نیوزڈیسک) پاکستان تحریک انصاف اور اے این پی کے کارکنوں میں تصادم۔ تفصیلات کے مطابق پاکستان تحریک انصاف کے کارکن جلوس کی شکل میں جا رہے تھے کہ مخالف جماعت اے این پی کے کارکنوں سے جھگڑا ہو گیا جس کے باعث دونوں سیاسی جماعتوں کے ورکروں نے ایک دوسرے پر فائرنگ کی ۔ فائرنگ سے تحریک انصاف کا تحصیل کونسلر اور تین افراد موقع پر جاں بحق ہو گئے جبکہ چار افراد کے زخمی ہونے کی اطلاع ملی ہے۔ تھانہ ہوتی کے ایس ایچ او مراد خان کے مطابق تحریک انصاف کے تحصیل کونسلر علاقے میں ایک شمولیتی جلسے کے لئے کارکنوں کے جلوس میں جا رہے تھے کہ مخالف سیاسی جماعت اے این پی کے کارکنوں سے ان کا آمنا سامنا ہوا۔دونوں گروہوں نے ایک دوسرے پر فائرنگ کر دی جس کے نتیجے میں تحریک انصاف کے تحصیل کونسلر مہمند خان، بلدیہ مردان کے ملازم اکرام، شاہ جہان اور قاسم خان موقع پر جاں بحق ہو گئے جبکہ بلال، اعظم، مبصر اور داؤد زخمی ہو گئے۔ زخمیوں کو ڈسٹرکٹ ہیڈکوارٹرز ہسپتال پہنچا دیا گیا ہے، جہاں 2 زخمیوں کی حالت نازک ہے۔