فیصل آباد (نیوزڈیسک) محکمہ لائیو سٹاک کی چھاپہ مار ٹیم کی کامیاب کارروائی میں مردہ اورلاغر جانوروں کا دو سو من گلا سڑا گوشت برآمد کرلیا گیا جبکہ دو افراد کو گاڑی سمیت حراست میں لے لیا گیا. لائیو سٹاک کی ٹیم نے خفیہ اطلاعات پر سرگودھا روڈ سمانہ پل کے نزدیک ایک مزدا گاڑی کو روک کرتلاشی لی تو اس میں سے مردہ اور لاغر جانوروں کا انتہائی گلا سڑا اور بدبو دار تقریباً دو سو من گوشت موجود تھا جس پر فوراً چھاپہ مار ٹیم نے حرکت میں آتے ہوئے گوشت قبضہ میں لے لیا جبکہ ڈرائیور اجمل اور اس کے ساتھی اعجاز کوگاڑی سمیت حراست میں لیکر قانونی کارروائی کا آغاز کردیا گیا ہے ملزمان کے مطابق گوشت جھنگ سے لایا گیا تھا اور اسے فیصل آباد اور اسلام آباد سپلائی کیا جانا تھا جبکہ ملزمان اس سے قبل بھی جھنگ سے گوشت لاکر فیصل آباد ‘پنڈی اوراسلام آباد سپلائی کر چکے ہیں اور ملزمان عرصہ دراز سے اس دھندہ میں ملوث ہیں ۔