کرا چی (نیوزڈیسک) پاکستان پیپلز پارٹی کے اراکین صوبائی اسمبلی خیر النسا مغل،شمیم ممتاز اور غزالہ سیال نے جنوبی پنجاب میں راجن پور کے کچے کے علاقے میں چھوٹو ڈکیت گینگ کی جانب سے پولیس اور قانون نافذ کرنے والے اداروں سے 20دن تک جنگ کرنے پر اپنے شدید تحفظات کااظہار کرتے ہوئے کہا کہ یہ صورت حال اس حقیقت کوآشکار کررہی ہے کہ چھوٹو گینگ کو پنجاب حکومت کی مکمل آشیرباد حاصل ہے۔ پی پی پی میڈیا سیل سندھ سے جاری ایک بیان میں انہوں نے کہا کہ پاک فوج کے سربراہ جنرل راحیل شریف نے جس حب الوطنی کے جذبے کے تحت ملک کے شمالی علاقوں سے دہشت گردی کے ناسور کو جڑ سے اکھاڑ پھینکا ہے اسی جذبے کے تحت قوم کو ان سے توقعات ہیں کہ وہ پنجاب میں دہشت گردوں کی پناہ گاہوں کے خاتمے کے ساتھ سہولت کاروں کو بھی فنا کر کے دم لیں گے۔ انہوں نے کہا کہ گزشتہ 24 دن سے چھوٹو گینگ کی جانب سے جاری مزاحمت پر پوری قوم تشویش میں مبتلا ہے اور حالات بتا رہے ہیں کہ پنجاب حکومت ایک مخصوص ایجنڈے کے تحت چھوٹو گینگ کے ذریعے ایک تیر سے دو شکار کرنا چاہتی ہے۔ انہوں نے جنرل راحیل شریف کو مخاطب کرتے ہوئے کہا کہ پوری قوم بالخصوص پاکستان پیپلز پارٹی کی پوری قیادت، پارلیمنٹرین اور کارکنان دہشت گردی کے خلاف جاری جنگ میں پاک فوج کے شانہ بشانہ کھڑے ہیں۔ انہوں نے جنرل راحیل شریف سے مطالبہ کیا کہ چھوٹو گینگ کے جلد از جلد خاتمے کے ساتھ پنجاب میں دہشت گردوں کی پناہ گاہوں کو بھی ملیا میٹ کیا جائے اور ن لیگ میں موجود ان کے سرپرستوں کو انصاف کے کٹہرے میں لایا جائے۔