اسلام آباد(این این آئی)پاکستان پیپلز پارٹی کے رہنما اور سینیٹ میں قائد حزب اختلاف اعتزاز احسن نے کہاہے کہ وزیر اعظم نواز شریف لندن صرف اور صرف آصف زرداری کے دربار حاضری دینے جا رہے ہیں۔پارلیمنٹ ہاؤس اسلام آباد کے باہر میڈیا سے بات کرتے ہوئے اعتزاز احسن نے کہاکہ لگتا ہے وہ چوہدری نثار کے اعصاب پر سوار ہوگئے ہیں اس لئے انہوں نے گزشتہ روز غیر شائستہ زبان استعمال کی ٗچوہدری نثار ان کا احتساب اپنے ماتحت آفیسر سے کروا لیں تاہم اپنے اثاثے اور ٹیکس بھی بتائیں ٗوہ اپوزیشن کی جانب سے چوہدری نثار کے شکر گزار ہیں کہ انہوں نے نواز شریف کے خلاف سب بول دیا، چوہدری نثار نے بھانڈا پھوڑ دیا کہ لندن کے مے فیئر اپارٹمنٹس نواز شریف کے ہیں اور انہوں نے اسے کبھی نہیں چھپایا ٗ اگر نواز شریف نے مے فیئر اپارٹمنٹس کبھی نہیں چھپائے تو الیکشن کمیشن میں جمع کرائے گئے اثاثوں میں ان کا اندراج کیوں نہیں ہے۔اعتزاز احسن نے کہاکہ وزیر خزانہ اسحاق ڈار نے علما حضرات کو ڈی چوک سے اٹھا دیا ورنہ لگتا ہے معاملہ کہیں اور جا رہا تھا، وزیر اعظم نواز شریف لندن طبی معائنے کے لئے نہیں بلکہ صرف اور صرف آصف زرداری کے دربار حاضری دینے جا رہے ہیں، لیکن اگر اب کی بار ہم نے ان کا کا ساتھ دیا تو نقصان پیپلز پارٹی کا ہوگا، اپنی رائے پارٹی کے چیئرمین اور شریک چیئرمین تک ضرور پہنچاؤں گا، اگر وزیر اعظم کو ان کی تقریر کی وجہ سے بیماری لاحق ہوئی ہے تو آئندہ کوشش کریں گے اتنا سچ نہ بولیں۔