اسلام آباد/لاہور /فیصل آباد /پشاور /مظفر آباد /سوات /نئی دہلی/کابل(نیوزڈیسک)پاکستان ٗ بھارت اور افغانستان میں شدید زلزلے کے جھٹکے محسوس کئے گئے ٗ زلزلے کے جھٹکوں کے بعد پاکستان میں شہری کلمہ طیبہ اور درود شریف کا ورد کرتے ہوئے گھروں سے باہر نکل آئے ٗخیبر پختون خوا اورآزاد کشمیر میں کچے مکانات اور دیواریں گرنے سے تین افراد ہلاک جبکہ متعدد زخمی ہوگئے ٗ ہسپتالوں میں ایمر جنسی نافذ کر دی گئی ٗگلگت بلتستان میں لینڈ سلائیڈنگ اور گلیشیئر کے ٹکڑے گرنے سے کئی مکانات کو نقصان پہنچا ٗ بڑی عمارتوں میں دراڑیں پڑ گئیں ٗ آفٹرشاکس کے پیش ریسکیو اداروں کوالرٹ کردیا گیا ۔ اتوار کو دارالحکومت اسلام آباد جڑواں شہر راولپنڈی ٗ صوبائی دارالحکومت لاہور ٗفیصل آباد، گجرات، منڈی بہاؤالدین، سرگودھا، حافظ آباد، چکوال، گڑھ مہاراجہ ،جہلم، بھکر، ڈیرہ غازی خان ٗملتان ٗ خیبر پختونخوا میں پشاور کے علاوہ کوہاٹ، ہنگو، ایبٹ آباد، مردان ٗ ڈیرہ اسماعیل خان، چترال، قبائلی علاقوں میں باجوڑ ایجنسی، خیبر ایجنسی، مہمند ایجنسی ٗ جنوبی وزیرستان ٗ شمالی وزیرستان ٗآزاد کشمیر میں مظفر آباد اور بھمبر سمیت ملک شہروں میں زلزلے کے جھٹکے محسوس کئے گئے۔امریکی جیولوجیکل سروے کے مطابق پاکستان میں اتوار کی دوپہر تین بجکر 29 منٹ پر آنے والے زلزلے کی شدت 6.6 تھی اس کا مرکز افغانستان میں تاجکستان کی سرحد کا قریبی علاقہ بتایا گیا پاکستان کے زلزلہ پیما سینٹر کے مطابق زلزلے کا مرکز کوہ ہندوکش، افغانستان تھا اور اس کی گہرائی 236 کلو میٹر تھی اور پاکستانی محکمہ موسمیات کے مطابق زلزلے کی شدت 7.1 تھی ۔ شدید جھٹکوں کے بعد پاکستان میں شہری کلمہ طیبہ اور درود شریف کا ورد کرتے ہوئے گھروں سے باہر نکل آئے اور کئی گھنٹے کھلے آسمان تلے گزارے ۔خیبر پختون خوا اور آزاد کشمیر میں کچے مکانات کی چھتیں اور دیواریں گر گئیں جس کے نتیجے میں متعدد افراد زخمی ہوگئے۔عینی شاہدین نے بتایا کہ زلزلے کا پہلا جھٹکا معمولی نوعیت کا تھا تاہم اس کے کچھ ہی لمحوں بعد زیادہ شدت کے جھٹکے محسوس کئے گئے۔ جس کے بعد لوگ خوف زدہ ہوکر اپنے گھروں سے باہر نکل آئے ٗزلزلے کے باعث مواصلاتی نظام تعطل کا شکار ہوگیا۔ادھر پشاور کے لیڈی ریڈنگ ہسپتال میں 2 بچے زخمی حالت میں لائے گئے جس کے بعد شہر کے تینوں سرکاری ہسپتالوں میں ایمرجنسی نافذ کردی گئی اپر دیر میں زلزلہ کے باعث مکان کی چھت گرنے سے خاتون اور 3 بچے ملبے تلے جنہیں زخمی حالت میں نکال لیا گیا ۔ گلگت بلتستان کے مختلف علاقوں میں لینڈ سلائیڈنگ اور گلیشئیر کے ٹکڑے گرنے سے کئی مکانات کو نقصان پہنچا ادھر نیشنل ڈزاسٹر مینجمنٹ اتھارٹی (این ڈی ایم اے) نے نیشنل ہائی وے اتھارٹی (این ایچ اے) ، واٹر ایند پاور ڈیولپمنٹ اتھارٹی (واپڈا) ، صوبائی ڈزاسٹر مینجمنٹ اتھارٹیز (پی ڈی اے) اور ضلعی حکومت سے نقصانات کے حوالے سے رپورٹ طلب کرلی۔خیبر پختونخوا کی پی ڈی ایم اے کو گلگت، چترال اور صوبے میں ممکنہ نقصانات کا جائزہ لینے کی ہدایت کی گئی ٗاین ڈی ایم اے نے شدید زلزلے کے بعد آفٹر شاکس کا خدشہ بھی ظاہر کیا ٗوفاقی دارالحکومت کے ڈپٹی کمشنر کی ہدایت پر اسلام آباد کے ہسپتالوں میں ہنگامی صورتحال نافذ کی گئی البتہ فوری طورپر اسلام آباد سے کسی قسم کے جانی یا مالی نقصان کی اطلاع سامنے نہیں آئی۔دوسری جانب بھارت کے شمال مغربی حصوں ٗ دارالحکومت نئی دہلی ٗ مختلف ریاستوں پنجاب، ہریانہ سمیت دیگر علاقوں میں زلزلے کے جھٹکے محسوس کئے گئے جس کے بعد لوگ عمارتوں سے باہر نکل آئے ٗنئی دہلی میں زلزلے کے جھٹکوں کے بعد میٹرو ٹرین کو روک دیا گیا پاکستان سے ملحقہ افغان وعلاقوں میں بھی زلزلے کے جھٹکے محسوس کیے گئے ہیں۔