راولپنڈی/ لاہور (نیوزڈیسک)سول و عسکری قیادت نے مربوط منصوبہ بندی اور آپریشنز کے ذریعے پنجاب بھر میں دہشتگردوں کیخلاف آپریشن تیز کرنے پر اتفاق صوبے سے انکا صفایا کرنے کے عزم کا اظہار کیا ہے ۔آئی ایس پی آر کے مطابق جائنٹ آپریشنز کوارڈی نیشن کمیٹی پنجاب کا اجلاس ہفتہ کو لاہور میں ہوا اجلاس میں پنجاب کے اعلیٰ سول اور عسکری حکام نے شرکت کی ۔ اجلاس میں صوبے بھر میں دہشتگردوں کیخلاف آپریشن تیز کرنے پر اتفاق کیا گیا اور فیصلہ کیا گیا کہ ڈویژن اور ضلع کی سطح پر فوجی اور سول حکام کے درمیان رابطوں کو مزید مربوط بنایا جائیگا ۔ اجلاس میں یہ بھی فیصلہ کیا گیا کہ کسی بھی آپریشن کے ہدف کے مطابق مناسب فورس استعمال کی جائیگی اور ہدف کے لحاظ سے ہی آپریشن میں فوج رینجرز انسداد دہشتگردی ڈیپارٹمنٹ یا پولیس استعمال کی جائیگی ۔ اجلاس کے شرکاءنے اس عزم کا اظہار کیا کہ مربوط منصوبہ بندی اور آپریشنز کے ذریعے پنجاب میں دہشتگردوں کا صفایا کیا جائیگا ۔