لاہور( این این آئی )پاکستان تحریک انصاف کے مرکزی ترجمان نے کہا ہے کہ انٹرا پارٹی انتخابات کو موخر یا ملتوی کرنے کی اطلاعات حقیقت کے برعکس ہیں ،نئی تنظیمیں قائم ہوتے ہی آئندہ عام انتخابات کیلئے قومی و صوبائی سطح پر امیدواروں کے چناؤ کیلئے پورے ملک میں پارلیمانی بورڈز قائم کر دئیے جائیں گے۔ پی ٹی آئی کے مرکزی ترجمان نعیم الحق نے اپنے بیان میں کہاہے کہ چیئرمین تحریک انصاف نے کارکنان کو انٹرا پارٹی انتخابات کی بھرپور تیاری کی ہدایت کر دی ہے اور کہا ہے کہ کارکنان بھرپور انداز میں انٹراپارٹی انتخابات میں حصہ لیں اور اہل افراد کو آگے لیکر آئیں۔انہوں نے کہا کہ پارٹی الیکشن کمیشن مئی اور جون میں انتخابات کروانے کا اعلان کر چکا ہے اورچیئرمین سے لیکر تحصیل کی صدارات تک کے تمام عہدوں کیلئے پولنگ کی تاریخ جاری کی جا چکی ہے۔ ترجمان نے کہا کہ نئی تنظیمیں قائم ہوتے ہی پورے ملک میں پارلیمانی بورڈز قائم کئے جائیں گے،پارلیمانی بورڈز آئندہ انتخابات کیلئے قومی و صوبائی سطح پر امیدواروں کا انتخاب کریں گے۔