کراچی(این این آئی)حساس اداروں کی جانب سے شہر قائد میں دہشت گردی کی بڑی واردات کے انتباہ کے بعد آئی جی سندھ کی جانب سے ریڈ الرٹ جاری کرتے ہوئے گورنر ہاؤس ،وزیراعلیٰ ہاؤس اور بلاول ہاؤس سمیت اہم عمارتوں کی سکیورٹی میں اضافہ کردیا گیا ہے ۔ذرائع کے مطابق حساس اداروں نے اپنے ایک مراسلے میں کراچی میں 48سے 72گھنٹوں کے دوران دہشت گردوں کی جانب سے کسی بڑی کارروائی کرنے کا خدشہ ظاہر کیا ہے ۔مراسلے کے مطابق دہشت گرد آئل ٹینکر میں بارود بھر کر کسی اہم عمارت سے ٹکراسکتے ہیں ۔مذکورہ انتباہ کے بعد آئی جی سندھ نے فوری طورریڈ الرٹ جاری کردیا ہے جبکہ گورنر ہاؤس ،وزیراعلیٰ ہاؤس ، بلاول ہاؤس،رینجرز ہیڈکوارٹر،قانون نافذ کرنے والے اداروں کے دفاتر،سفارتی مشنز،امام بارگاہوں ،جماعت خانوں اور گرجا گھروں سمیت شہر کی اہم عمارتوں کی سکیورٹی میں اضافہ کردیا گیا ہے ۔