اسلام آباد (نیوزڈیسک ) پاکستان تحریک انصاف کے پارلیمانی لیڈر شاہ محمود قریشی نے کہا ہے کہ پاناما لیکس نے پوری دنیا میں تہلکہ مچایا دیا ہے ہمیں ایک دوسرے پر کیچڑ اچھالنے کی بجائے ایک معقول راستہ تلاش کرنا ہوگا تاکہ ملک کا وقار بھی بلند ہو اور کرپشن کا ہمیشہ کے لئے راستہ بند کرسکیں۔ جمعہ کو قومی اسمبلی میں پانامہ پیپرز پر جاری بحث میں حصہ لیتے ہوئے شاہ محمود قریشی نے کہا کہ اپوزیشن جماعتوں نے پاناما لیکس پر اپنے تحفظات کا اظہار کیا تو حکومت نے اس کا جواب دیا۔ حکومت سمجھتی ہے کہ معاملہ اتنا سنگین نہیں۔ اگر ایسا ہوتا تو آئس لینڈ کا وزیراعظم استعفٰی نہیں دیتا۔ ارجنٹائن کے صدر کے خلاف تحقیقات شروع نہ ہوتیں۔ ہالینڈ کے سب سے بڑے بنک کا صدر بھی مستعفٰی نہ ہوتا اور بھارت میں یورپ میں تحقیقات شروع نہ ہوتیں۔ شاہ محمود قریشی کا کہنا تھا کہ 370 صحافیوں اور 100 میڈیا ہاوسز نے تحقیقات کرکے ایک کروڑ 15 لاکھ صفحات پر مشتمل رپورٹ جاری کی جس میں 200 پاکستانیوں کے نام بھی ہیں اپوزیشن جماعتیں چاہتی ہیں تحقیقات ہوں حکومت کہتی ہے تیار ہیں سب کا اس پر اتفاق ہے مسئلہ صرف یہ ہے کہ تحقیقات کیسے ہوں ؟ کمیشن کے قیام پر بھی سب متفق ہیں صرف اس کی نوعیت طے کرنا ہے کہ یہ کیسا ہوگا۔ ہم کسی کی پگڑی نہیں اچھالنا چاہتے ہم صرف اصلاح چاہتے ہیں۔ اس مقصد کے لئے قابل اعتماد تحقیقات چاہتے ہیں اور یہ کام صرف ایک جج کرسکتا ہے۔ جب ہم کنٹینر پر تھے تو کہا جاتا تھا کہ پارلیمنٹ میں آؤ۔ آج ہم یہ معاملہ پارلیمنٹ میں ہی اٹھارہے ہیں۔ وزیراعظم نے اپنے خطاب میں ریٹائرڈ جج کی سربراہی میں کمیشن کے قیام کا اعلان کیا ہمیں ان کی نیت پر شک نہیں مگر ماضی میں جتنے بھی کمیشن بنے ان میں حقائق سامنے نہ آسکے۔ کئی ایک کی تو رپورٹ تک شائع نہیں ہوئی۔ اسی لئے وزیراعظم کے اعلان کردہ کمیشن کو تمام اپوزیشن جماعتوں وکلا اور سول سوسائٹی نے مسترد کردیا ہے۔ ہمارا مطالبہ ہے کہ چیف جسٹس کی سربراہی میں کمیشن بنے جس کی معاونت بین الااقوامی فرم کرے۔ شاہ محمود قریشی کا کہنا تھا کہ افسوس کی بات ہے کہ اس اہم معاملہ پر ایف بی آر پر موت طاری ہے۔ الیکشن کمیشن گونگا بنا ہوا ہے۔ ہم کسی پر کیچڑ اچھالنے کی بجائے معقول راستہ تلاش کرنا چاہتے ہیں تاکہ ملک کا وقار بلند ہو اور کرپشن کا راستہ ہمیشہ ہمیشہ کے لئے بند ہوجائے۔