کراچی (نیوز ڈیسک )افغانستان کو چینی کی برآمد کرنے کی اجازت کے بعدسندھ اور پنجاب میں چینی کے نرخ میں10سے 15روپے فی کلو اضافہ ہو گیا ہے ۔کراچی میں چینی کی فی کلو ہو سیل قیمت60روپے پر پہنچ گئی ہے ریٹیل مارکیٹ میں چینی کی فروخت65روپے فی کلو پر جاری ہے ۔تفصیلات کے مطابق سندھ اور پنجاب میں چینی کی قیمتوں کو پر لگ گئے۔ کراچی سمیت سندھ بھر میں چینی ایک بار پھر مہنگی کردی گئی ہے۔ ہول سیل ریٹ میں چینی58 سے 60 جبکہ عام بازاروں میں چینی فی کلو دام62 سے65 روپے پر جا پہنچے۔ کراچی ہول سیل گروسرز ایسوسی ایشن کے صدر انیس مجید کے مطابق چینی کی قیمتوں میں اضافے کی وجہ افغانستان کو چینی برآمد کرنا ہے۔ حکومت چاہے تو چینی کی قیمت پھر مستحکم ہوسکتی ہے۔دوسری جانب چینی کے من مانے اضافے سے پریشان عوام نے چینی مہنگے کرنے کے اقدام کو مسترد کردیا ہے۔ عوام کا کہنا ہے برآمدات کو وجہ بنا کر چینی کی فی کلو قیمت میں10 سے15 روپے کا اضافہ نہ صرف سمجھ سے بالاتر ہے بلکہ منافع خور مافیاکے سامنے حکومت کی بے بسی کی بھی دلیل ہے۔