لاہور(نیوزوڈیسک )چےئرمےن تحریک انصاف کے پولیٹیکل ایڈوائزر عبدالعلیم خان نے کہا ہے کہ پنجاب حکومت ضد اور انا چھوڑ کر رحم کرے اور شہریوں کے وسیع تر مفاد میں اورنج لائن ٹرین کے اتنے بھاری بھر کم منصوبے پر نظر ثانی کرے ،165ارب روپے کے اس منصوبے کی بجائے اہل لاہور کو پینے کا صاف پانی ،تعلیم ،صحت اور روزگار کی ضرورت ہے ،ہم نے کچی آبادیوں کے رہائشیوں کو مالکانہ حقوق دیے جبکہ ٹرین منصوبے کے نام پر انہی غریبوں کو بے گھر کرنے کی سازشیں ہو رہی ہیں ، سول سوسائٹی اور لاہور کے شہریوں کا احتجاج درست ہے تحریک انصاف مکمل حمائیت کرتی ہے اور مطالبہ کرتی ہے کہ بالخصوص این اے122اور پی پی147کی کچی آبادیوں کو مسمار کرنے کا فیصلہ واپس لیا جائے ۔عبدالعلیم خان نے گڑھی شاہو اور اس سے ملحقہ علاقوں سے آئے ہوئے رہائشیوں سے بات چیت کرتے ہوئے کہا کہ میگا منصوبوں کے نام پر کرپشن کی رال ٹپکتی ہے اور اصل معاملہ زیادہ سے زیادہ کمیشن کھانے کا ہے ۔انہوں نے کہا کہ اورنج لائن کے 165ارب روپے سے صرف 40ارب روپے ٹرین پر خرچ ہونے ہیں جبکہ 125ارب روپے “من پسند کاروائیوں” پر لگائے جائیں گے ۔عبدالعلیم خان نے رہائشیوں کو یقین دلایا کہ تحریک انصاف ان کا بھرپور ساتھ دے گی اور انہیں گھروں سے بے دخل کرنے کی پالیسی کے خلاف مزاحمت کی جائے گی ۔عبدالعلیم خان نے کہا کہ لاہو ر شہر دن بدن مسائلستان بنتا جا رہا ہے جبکہ حکمران سب اچھا کا راگ آلاپ رہے ہیں ،اس موقع پر شہریوں نے ساتھ دینے پر عبدالعلیم خان کا شکریہ ادا کیا ۔