اسلام آباد(نیوز ڈیسک) فری اینڈ فیئر الیکشن نیٹورک (فافن ) نے ہفتہ کے روز پنجاب اور سندھ کے پہلے مرحلے میں 20 اضلاع میں ہونے والے انتخابات کے حوالے سے اپنی رپورٹ میں انتخابی طریقہ کارکی متعدد خلاف ورزیوں کی نشاندہی کی ہے۔تفصیلات کے مطابق لاہور میں الیکشن رپورٹ جاری کرتے وقت ایک پریس کانفرنس سے خطاب کرتے ہوئے فافن کے عہدیداروں کا کہنا تھا کہ فافن نے پنجاب کے 12 اضلاع کے 249 پولنگ سٹیشنز کا سروے کیا ہے جس کے بعد رپورٹ مرتب کی گئی ہے۔ انہوں نے بتایا کہ حالیہ بلدیاتی الیکشن میں ویسی ہی غلطیاں تھیں جیسی کہ 2013 کے الیکشن میں دیکھنے میں آئی تھیں۔ 6 فیصد پولنگ سٹیشنز پر فافن کے نمائندوں کو گنتی کے عمل کی نگرانی سے روکا گیا جبکہ کئی مقامات پر پولنگ سٹیشنز کے اندر ووٹرز کو من پسند امیدواروں کو ووٹ ڈالنے کیلئے قائل کیا گیا۔´پولنگ کے عمل کے دوران 14.6 فیصد پولنگ سٹیشنز پر تشدد کے واقعات سامنے آئے جبکہ پولنگ ڈے تک انتخابی مہم دوسرے صوبوں کی نسبت پرامن رہی ہے۔ ضابطہ اخلاق کی زیادہ تر خلاف ورزیاں بہاولنگر، گجرات، قصور، لاہور، لودھراں میں سامنے آئیں۔فافن کے عہدیداروں نے بتایا کہ 55 فیصد پولنگ سٹیشنز پر سیکیورٹی اہلکار پولنگ سٹیشنز کے اندر موجود تھے۔