کراچی (نیوزڈیسک) رینجرز نے جمعرات کو ایم کیو ایم کے مرکز نائن زیرو کے اطراف گشت کیا جبکہ رینجرز کی بھاری نفری خورشید میموریل ہال کے باہر گشت کرنے کے بعد واپس چلی گئی۔ ایم کیو ایم کے رہنما ڈاکٹر فاروق ستار کے مطابق رینجرز اہلکار ایم کیو ایم کے کسی دفتر میں داخل نہیں ہوئے بلکہ نائن زیرو کے اطراف گشت کرنے کے بعد واپس چلے گئے ہیں۔ ہمیں کچھ معلوم نہیں کیا ہوا ہے۔ تفصیلات کے مطابق جمعرات کو رینجرز کی بھاری نفری مکا چوک سے نائن زیرو کی گلیوں میں داخل ہوئی۔ رینجرز کی نفری میں ونگ کمانڈر بھی شامل تھے۔ رینجرز اہلکار جس وقت نائن زیرو کے اطراف گشت کررہے تھے۔ اس وقت خورشید میموریل ہال میں ڈاکٹر فاروق ستار کی پریس کانفرنس جاری تھی۔ ڈاکٹر فاروق ستار نے کہا کہ خورشید میموریل ہال کے باہر رینجرز کی موبائلیں موجود ہیں۔ ہمیں نہیں معلوم کہ رینجرز کیوں آئی ہے۔ پریس کانفرنس کے دوران میڈیا کے کیمرے بند کرادیئے گئے تھے۔ ڈاکٹر فاروق ستار نے کہا کہ ہمیں کچھ معلوم نہیں کہ کیا ہوا ہے۔ رینجرز اہلکار کسی کارکن یا رہنما کو لے کر نہیں گئے۔ رینجرز اہلکار نائن زیرو کے اطراف گشت کرنے کے بعد واپس چلے گئے۔