اسلام آباد( نیوزڈیسک)سپریم کورٹ نے قومی احتساب بیورو سے پچاس میگا سکینڈلز کی تفصیلات طلب کر لیں ، جسٹس جواد ایس خواجہ کہتے ہیں ملک میں بدعنوانی کا واویلا ہے نیب خاموش ہے۔ تفصیلات کے مطابق احتساب بیورو میں بد انتظامیوں اور بے ضابطگیوں سے متعلق کیس کی سماعت جسٹس جواد ایس خواجہ کی سربراہی میں تین رکنی بینچ نے کی۔ جسٹس جواد ایس خواجہ نے ریمارکس دیئے کہ قوم بدعنوانی کا چرچہ کر کے تھک گئی ہے۔ کراچی میں بدعنوانی کا واویلا ہو رہا ہے اور نیب خاموش ہے۔ جسٹس شیخ عظمت سعید نے کہا کہ کیا نیب کو کراچی میں چائینہ کٹنگ کی کوئی شکایت نہیں ملی۔ نیب میں 75 فیصد شکایات پلی بارگین کے نتیجے میں ختم ہو جاتی ہیں۔ نیب کی جانب سے ملزمان چھوڑنے کی شرح سب سے زیادہ ہے ، عدالت عظمیٰ نے نیب سے اسلام آباد ، کراچی اور لاہور میں بدعنوانی کے پچاس میگا سکینڈلز کی تفصیلات پیش کرنے کا حکم دیتے ہوئے ہدایت کی ہے کہ مالیاتی بدعنوانی، قبضہ مافیا، اختیارات سے تجاوز کی کیٹیگریز میں میگا سکینڈلز کی تفصیلات چیئرمین نیب کے دستخطوں سے جمع کرائی جائیں۔ کیس کی مزید سماعت سات جولائی تک ملتوی کر دی گئی۔