اسلام آباد(نیوز ڈیسک) فیصل آباد کے نواحی علاقے ڈجکوٹ میں ماں اپنی خوشیوں کی قاتل خود بن گئی ، گھریلو جھگڑے پر ماں نے اپنے دو جگر گوشوں کو کلہاڑی کے وار کرکے موت کی وادی میں بھیج دیا ، پولیس نے آلہ قتل برآمد کر کے خاتون کو گرفتار کر لیا ہے۔ سمندری روڈ پر واقع ڈجکوٹ کے نواحی گاو¿ں میں سنگ دل خاتون کی بربریت نے انسانیت کو شرمندہ کردیا۔ بچوں کے لیے ڈھال بن جانے والی ماں کی ممتا ہی مرگئی ، پتھردل خاتون نے گھریلو جھگڑے پر اپنی ہی گود اجاڑ لی۔ 34 سالہ سلمیٰ خاوند سے لڑ کر میکے آئی ، غصے سے جنونی ہوجانے والی خاتون نے آتے ہی درندگی سے کلہاڑی کے وار کیے اور اپنے دو معصوم بچوں 5 سالہ مبشر اور 7 سالہ معافیہ کو موت کی گہری کھائی میں اتار دیا۔ سلمیٰ کی شادی 10 برس پہلے ڈجکوٹ میں شکور نامی شخص سے ہوئی تھی۔ دردناک واقعے سے پورا علاقہ غم میں ڈوب گیا ہے اور لوگ بڑی تعداد میں پہنچ گئے۔ پولیس نے موقع پر پہنچ کر دونوں معصوموں کی لاشوں کو پوسٹ مارٹم کے لئے ہسپتال منتقل کر دیا ، پولیس نے آلہ قتل برآمد کے ملزمہ کو گرفتار کرلیا ہے اور مزید تفتیش شروع کر دی ہے۔ پولیس کے مطابق ملزمہ کے خاوند سے رابطہ ہو گیا اور جلد ہی مقدمہ درج کر کے ملزمہ کو سزا دلوائی جائے گی۔