لندن(نیوزڈیسک)ایم کیو ایم کی برطانیہ میں پراپرٹی کمپنی میں بھارتی شہریوں کی طرف سے لاکھوں پاﺅنڈز جمع کرانے کا انکشاف ہوا ہے جبکہ کمپنی کے ایک ڈائریکٹر بھی بھارتی ہیں۔میڈیا رپورٹ کے مطابق ایم کیو ایم کے قائد الطاف حسین کی نہ صرف برطانیہ بلکہ کینیڈا میں بھی پراپرٹی فرم رجسٹرڈ ہے،یورو پراپرٹی پرائیویٹ لمیٹڈ، یورو پراپرٹی ڈویلپمنٹ لمیٹڈ،یورو ڈویلپمنٹ اور یورو پراپرٹی کینیڈا کے نام سے قائم کمپنیوں کے اکاﺅنٹس میں تین بھارتی شہریوں نے ایک ملین پاﺅنڈ سے زائد رقم 2012 اور 2013میں جمع کرائی۔ان اکاﺅنٹس اور رقوم جمع کرانے کی تفصیلات کا علم اسکاٹ لینڈ یارڈ کو منی لانڈرنگ کیس کی تفتیش کے دوران ہوا،ان اکاﺅنٹس اور رقوم کی منتقلی کے ثبوت بھی اسکاٹ لینڈ یارڈ کے پاس موجود ہیں۔ان کمپنیوں کی ملکیت الطاف حسین کے نام پر ہی ہے،الطاف حسین 25جون 2006 کو یورو پراپرٹی کمپنی کے ڈائریکٹر بنے اس کے ایک دن بعد ان کے قریبی ساتھی محمد انور کو بھی ڈائریکٹر بنایا گیا،منی لانڈرنگ کا مقدمہ بننے تک دونوں لیڈر اس کمپنی کے ڈائریکٹر رہے اور 16 جنوری 2014 کو کمپنی سے استعفیٰ دیا،اس کے بعد ایک دن کے لئے ایم کیو ایم کے رہنماں عادل صدیقی اور سہیل منصور کو ڈائریکٹر بنایا گیا اور دوسرے ہی روز استعفیٰ لے لیا گیا اس کے بعد کمپنی کے تین ڈائریکٹر بنائے گئے جن میں ارشد عبداللہ وہرا،قاسم علی اور اظہارالدین خان شامل ہیں۔اس سال 31 مئی کو بھی اس کمپنی کے اکاﺅنٹس میں 12 کروڑ روپے سے زائد رقم موجود تھی۔