اسلام آباد (نیوزڈیسک) وزیر مملکت پانی و بجلی عابد شیر علی نے کہا ہے کہ ساڑھے 8 ہزار میگا واٹ بجلی صرف ایئر کنڈیشن کی نظر ہو جاتی ہے جس کی وجہ سے ٹرانسفارمر اڑتے ہیں، ملک بھر میں 85 سے 90 فیصد علاقوں میں سحر و افطار کے اوقات کار میں لوڈ شیڈنگ نہیں ہو رہی، منگل کو آئیسکو ہیڈ کوارٹر میں افطار ڈنر کے موقع پر بریفنگ دیتے ہوئے انہوں نے کہا کہ درجہ حرارت بڑ ھنے سے اچانک بجلی کی طلب ساڑھے 18 ہزار سے 21 ہزار تک پہنچ گئی، انہوں نے کہاکہ شہری علاقوں میں 6 ،دیہات میں 8 گھنٹے لوڈ شیڈنگ کی جا رہی ہے ، انہوں نے کہاکہ حکومت محدود مسائل کے باوجود عوام کی ضرورت سے بخوبی آگاہ ہے اور ہماری پوری کوشش ہے کہ بجلی بحران پر جلد قابو پا لیں،گزشتہ 3اہ سے ٹرانسفارمروں کی خریداری شروع کی۔ انہوں نے کہا کہ ماضی میں جو6 لاکھ میں خر یدے جاتے تھے وہ 3 لاکھ روپے میں خرید کر اربوں روپے کی بچت کی۔ انہوں نے کہاکہ ملک بھرمیں 10 سے 12 لاکھ ایئر کنڈیشن فروخت ہوئے ہیں۔ عابد شیر علی نے کہاکہ پشاور میں 4 گھنٹے اور لاڑکانہ میں 6 گھنٹے کی لوڈ شیڈنگ ہو رہی ہے۔ وزیر اعلیٰ خیبر پختونخوا نے 1400 میگا واٹ بجلی مانگی تھی ہم 1457 میگا واٹ بجلی دے رہے ہیں اب اس بجلی کو ایڈجسٹ کرنا ان کی ذمہ داری ہے۔ بلوچستان میں اس سے قبل ساڑھے 4 سو میگا واٹ سے زائد بجلی نہیں دے سکتے تھے لیکن اب اپ گریڈیشن کے بعد ساڑھے 7 سو میگا واٹ بجلی دے رہے ہیں، انہوں نے کہاکہ کراچی میں ساڑھے 5 سو اموات کا ہمیں بھی شدید دکھ ہے ، ان کے خاندانوں کے ساتھ اظہار افسوس کرتے ہیں۔ وفاقی حکومت اب بھی ساڑھے 6 سو میگا واٹ بجلی کے الیکٹرک کو فراہم کر رہی ہے۔ اس موقع پر انہوں نے مختلف ڈسکوز کے ہیڈز کے ساتھ ویڈیو کانفرنس کے ذریعے صحافیوں کے سوالوں کے جوابات دئیے۔