لاہور(نیوزڈیسک)حکومتِ پنجاب نے بیرونِ ملک مقیم پاکستانیوں کی دیرینہ اور پیچیدہ شکایات کے ازالے کے لئے ویب سائیٹ اور ہیلپ قائم کر دی ہے ۔ یہ بات چیئرمین پنجاب انفارمیشن ٹیکنالوجی بورڈ ڈاکٹر عمر سیف نے اپنے دفتر میں ایک اجلاس کی صدارت کرتے ہوئے کہی۔ انہوں نے کہا کہ پاکستانی تارکین وطن کو ہمیشہ سے شکایت رہی ہے کہ انکے آبائی شہروں میں انکی جائدادوں پر قبضے ہو جاتے ہیں یا وطن آنے پر انہیں اغوا ءبرائے تاوان اور دیگر جرائم کا سامنا کرنا پڑتا ہے۔ اس قسم کے مسائل کو اعلیٰ حکام تک پہنچانا بذاتِ خود ان کے لئے ایک مشکل کام تھا۔ ڈاکٹر عمر سیف نے کہا کہ انہی مشکلات کے پیش نظر وزیر اعلیٰ پنجاب محمد شہباز شریف نے پنجاب اوور سیز پاکستانیز کمیشن قائم کیا جس کو موثر بنانے کے لئے ہم نے کمیشن کی ویب سائیٹ بھی قائم کر دی ہے۔ اس ویب سائیٹ پرضروری معلومات کے ساتھ ساتھ شکایات کے اندراج کی آن لائن سہولت فراہم کی گئی ہے نیز بذریعہ فون شکائت کے اندراج کےلئے ہیلپ لائن+92-42-111-672-672چوبیس گھنٹے فعال رہتی ہے ۔ ڈاکٹر عمر سیف نے کہا کہ اس طریقے سے درج ہو نے والی شکایات بلا تاخیر متعلقہ محکمے یا دفتر تک پہنچ جاتی ہے نیز ان پر عملدرآمد کو یقینی بنانے کے لئے وزیر اعلیٰ اور چیف سیکریٹری کو باقاعدگی سے رپورٹ بھجوانے کا نظام بھی فراہم کیا گیا ہے۔انہوں نے کہا کہ ویب سائیٹ پر تارکینِ وطن کی آسانی کے لئے پیدائش و اموات کے لیٹ اندراج اور مختلف لائنسنسوں کے حصول کے لئے درخواست فارم بھی فراہم کیے گئے ہیں۔ انہوں نے بیرون ملک مقیم پاکستانیوں سے درخواست کی کہ وہ ویب سائیٹ کا مطالعہ کریں اور اسے مزید بہتر بنانے کے لئے دیے گئے لنک پر اپنی تجاویز بھی دیں