اسلام آباد(نیوز ڈیسک)وزیراعلیٰ پنجاب میاں شہباز شریف وزیر داخلہ چوہدری نثار علی خان اور وزیراعظم کے معاون خصوصی آصف کرمانی کے ہمراہ راولپنڈی میں پولیس اہلکاروں کی فائرنگ سے جاں بحق ہونے والے دو بھائیوں کے گھر پہنچ گئے ، لواحقین سے تعزیت کی اور یقین دلایا کہ اہلکاروں کیخلاف سخت کارروائی کی جائے گی ، وزیراعلیٰ نے مقتول بھائیوں کے لواحقین کے لئے 15,15لاکھ امداد کا اعلان بھی کیا ۔ میڈیا رپورٹس کے مطابق مقتول بھائیوں کے لواحقین سے اظہار تعزیت کرتے ہوئے وزیراعلیٰ پنجاب شہباز شریف کا کہنا ہے کہ 2 بھائیوں کے قتل میں ملوث پولیس اہلکار کو کیفر کردار تک پہنچا کر لواحقین کو انصاف دلائیں گے اور ملزم کے ساتھ کسی قسم کی نرمی نہیں برتی جائے گی ا س موقع پر وزیر داخلہ چوہدری نثار علی خان نے کہا کہ واقعہ انتہائی اندوہناک ہے اور اس واقعے پر دل دکھی ہے ملزموں کو ہر حال میں سزا ملے گی ۔ وزیراعلیٰ پنجاب نے اس موقع پر مقتول بھائیوں کے لواحقین کے لئے 15، 15 لاکھ روپے امداد کا اعلان بھی کیا۔ اس موقع پر وزیراعلیٰ کے ہمراہ راولپنڈی کی مقامی قیادت میٹرو بس منصوبے کے چیئرمین سابق ایم این اے حنیف عباسی ، شکیل اعوان اور ضیاءاللہ شاہ اور ایم پی اے راجہ حنیف ایڈووکیٹ بھی موجود تھے ۔واضح رہے کہ 3 روز قبل راولپنڈی میں پولیس اہلکار کی فائرنگ سے موٹر سائیکل پر سوار 2 بھائی جاں بحق ہو گئے تھے۔

مزید پڑھئے:چولستان کی بیٹی نے علاقے کی قسمت بدل ڈالی،کیسے؟