پشاور(نیوزڈیسک)خیبرپختونخوا کے سہ فریقی اتحاد نے صوبائی حکومت سے فوری مستعفی ہونے کامطالبہ کرتے ہوئے آل پارٹی کانفرنس میں شرکت نہ کرنے کااعلا ن کیا ہے ،دس جون کوصوبہ بھر میں شٹرڈاﺅن اوراحتجاجی مظاہرے کئے جائیں گے ،پی ٹی آئی حکومت نے بلدیات انتخابات میںدھاندلی کی انتہاکردی ۔پیر کے روز سہ فریقی اتحاد عوامی نیشنل پارٹی ،پیپلزپارٹی اورجے یوآئی کامشترکہ اجلاس منعقد ہوا ،اجلاس کے بعد مےڈیا کوبریفنگ دیتے ہوئے سہ فریقی اتحاد کے صدر میاں افتخارحسین نے کہا کہ خیبرپختونخواحکومت فی الفور رضاکارانہ طورپررمستعفی ہوجائے،کیونکہ انہوںنے انتخابات میں ریکارڈ دھاندلی کی ہے ،صوبائی حکومت دھاندلی میں ملوث ہے اس لئے انہیں حکمرانی کاکوئی حق نہیں،وزیراعلی کے بھائی نے اپنے حلقے مےں رات بارہ بجے تک پولنگ جاری رکھااس سے بڑھ کر کیا مثال ہوسکتی ہے ،میاں افتخارکاکہنا تھا کہ جبکہ صوبائی حکومت مستعفی نہیں ہوجاتی ہمارا احتجاج جاری رہے گا،دس جون کوشٹرڈاﺅن ہڑتال کافیصلہ برقرارہے ،اجلاس میں متفقہ فیصلہ کیاگیا ہے کہ صوبائی حکومت کی طلب کردہ آل پارٹی کانفرنس میں شرکت نہیں کریں گے،سہ فریقی اتحاد اے پی سی میں شرکت نہیں کریگی،حکومت نے کل جماعتی کانفرنس بدنیتی پر بلائی ہے ،انہوںنے کہا کہ شہر پشاورکے مختلف علاقوں میں احتجاجی مظاہرے ،جلسے اورجلوس نکالیں جائیں گے،ہڑتال کوکامیاب بنانے کےلئے تاجربرداری سے بھی رابطے کئے ہیں ،ان کاکہنا تھا کہ تحریک انصاف حکومت نے دھاندلی کی انتہاکردی ہے ،پورے صوبے میں ایسی بدنظمی کبھی نہیں دیکھی ۔ہمارا یہی مطالبہ ہے کہ صوبائی حکومت فوری مستعفی ہوجائے اورنگران سیٹ اپ کے ذریعے انتخابات کرائے جائیں