الیکشن ٹربیونل کافیصلہ کالعدم،تحریک انصاف کی کامیابی،کارکنوں کاجشن

8 جون‬‮ 2015 |

اسلام آباد(نیوزڈیسک)الیکشن ٹربیونل کافیصلہ کالعدم،تحریک انصاف کی کامیابی،کارکنوں کاجشن،تفصیلات کے مطابق الیکشن کمیشن نے تحریک انصاف کے رکنِ قومی اسمبلی رائے حسن نواز کی رکنیت بحال کر دی۔ اٹھائیس مئی کو جاری کردہ ضمنی انتخاب کا شیڈول بھی واپس لے لیا گیا۔ ترجمان الیکشن کمیشن کے مطابق سپریم کورٹ کے فیصلے کی روشنی میں قومی اسمبلی کے حلقہ این اے 162 ساہیوال تھری سے تحریک انصاف کے امیدوار رائے حسن نواز کی رکنیت بحال کر دی گئی اس کے ساتھ ساتھ الیکشن کمیشن نے اٹھائیس مئی کو متعلقہ حلقہ کیلئے جاری کردہ ضمنی انتخاب کا شیڈول بھی واپس لے لیا جس کے تحت وہاں پانچ اگست کو ضمنی انتخاب ہونا تھا۔ سپریم کورٹ نے تین جون کو اپنے فیصلے میں رائے حسن نواز کی رکنیت بحال کرنے کا حکم دیا تھا رائے حسن نواز کو گذشتہ ماہ الیکشن ٹربیونل نے ان کے مخالف امیدوار محمد ایوب خان کی درخواست پر نااہل قرار دیدیا تھا جس کے خلاف انہوں نے سپریم کورٹ سے رجوع کیا۔ الیکشن ٹربیونل نے حلقے میں نوے روز کے اندر دوبارہ انتخابات کرانے کا بھی حکم دیا تھا۔ رائے حسن نواز کی رکنیت کی بحالی پر تحریک انصاف کے کارکنوں نے خوشی کا اظہار کیا ہے رائے حسن نواز کے حلقہ میں تحریک انصاف کے کارکنوں سڑکوں پر نکل آئے اور جشن منانا شروع کردیا۔