اسلام آباد(نیوزڈیسک)وزیر اعظم نوا زشریف نے طویل عرصہ بعد مسلم لیگ (ضیائ) کے صدر اعجاز الحق کو ایک مرتبہ پھر اپنا بھائی قرار دیدیا ۔ تفصیلات کے مطابق میٹرو بس منصوبے کی افتتاحی تقریب کے دوران کنونشن سنٹر میں وزیر اعظم انتہائی خوش گوار موڈ میں نظر آ رہے تھے اور اپنی تقریر کے دوران انہوں نے محمود خان اچکزئی ‘ مولانا فضل الرحمن اور راجہ ظفر الحق کے نام خصوصی طور پر لئے اور شرکاءکی نشستو ں میں موجود مسلم لیگ (ضیاء) کے صدر اعجاز الحق کو اپنا بھائی کہہ کر مخاطب کیا۔ واضح رہے کہ 12 اکتوبر 1999ءکے بعد جب سابق حکمران جنرل (ر) پرویز مشرف نے اقتدار پر قبضہ کیا تھا تو اعجاز الحق نے مسلم لیگ (ن) سے علیحدگی اختیار کر کے مسلم لیگ (ق) میں شمولیت اختیار کر لی تھی اور مشرف دور میں وہ مذہبی امو رکے وزیر بھی رہے۔ 2013ءکے عام انتخابات سے قبل انہیں مسلم لیگ (ن) کا ٹکٹ دینے کا فیصلہ اچانک نواز شریف نے واپس لے لیا تھا جس کے بعد اعجاز الحق کو مسلم لیگ (ضیاء) کے ٹکٹ پر الیکشن لڑنا پڑا اور انہوں نے مسلم لیگ (ن) کے امیدوار کو ہارون آباد سے 30 ہزار سے زائد ووٹوں سے شکست دی تھی تاہم حکومت بننے کے بعد انہوں نے عمران خان کی طرف سے تحریک انصاف کا اتحادی بننے کی پیشکش مسترد کر کے مسلم لیگ (ن) کی حکومت کی حمایت کا اعلان کر دیا تھا۔ اور اب طویل عرصہ بعد نوا زشریف کے ساتھ ان کی دوریاں ختم ہو گئی ہیں اور سیاسی حلقوں نے اعجاز الحق کو اپنا بھائی قرار دینے پر نواز شریف کے بیان کو خصوصی اہمیت دی جبکہ اعجاز الحق کے والد سابق صدر ضیاءالحق نے 1988ءمیں ایک موقع پر وزیر اعظم نواز شریف کو اپنا روحانی بیٹے کا خطاب دیا تھا ۔