اسلام آباد((نیوزڈیسک) عام انتخابات میں مبینہ دھاندلی کی تحقیقات کےلئے قائم کمیشن نے جمعرات کو چیئرمین نادرا عثمان مبین کو بطور گواہ طلب کرلیا۔ جمعہ کو فافن کے مدثر رضوی بیان ریکارڈ کرائیں گے۔ تحریک انصاف نے نبیل گبول کانام گواہوں کی فہرست سے واپس لے لیا ۔ پیر کو چیف جسٹس ناصر الملک کی سربراہی میں انکوائری کمیشن کے 13 ویں اجلاس میں منیجر پی سی بی کراچی اور سیکیورٹی اینڈ پرنٹنگ کے ایم ڈی رضوان احمد سے جرح کی گئی۔تحریک انصاف کے وکیل حفیظ پیرزادہ نے کہا کہ سینئر اینکر حامد میر اور فافن کے مدثر رضوی کو بھی کمیشن کے سامنے پیش کریں گے۔ فافن کی جانب سے جو دستاویزات جمع کرائی گئی ہیں وہ ہمارے پاس موجود نہیں، عبدالحفیظ پیرزادہ کی درخواست پر سربراہ کمیشن نے فافن کی دستاویزات متعلقہ فریقین کو فراہم کرنے کی ہدایت کی۔ سیکیورٹی پرنٹنگ کارپوریشن کے ایم ڈی رضوان احمد نے کمیشن کو بتایا کہ 2008ءمیں 257،2013ءمیں 371 حلقوں کے بیلٹ پیپرز چھاپے، 2008ءکی نسبت 2013ءمیں حلقے زیادہ ہونے کے باعث زائدکاغذ خریدا گیا۔ تحریک انصاف کے وکیل حفیظ پیرزادہ کی درخواست پر انکوائری کمیشن کی سماعت جمعرات تک ملتوی کردی گئی۔