بہاول پور(نیوز ڈیسک)امیر اورغریب کو انصاف کی فراہمی یکساں مہیا کی جائے، صفورا چورنگی واقعے میں ملوث دہشت گردوں کو کیفر کردار تک پہنچایا جائے، پاکستان تحریک انصاف کا 15مئی کو ملتان میں ہونے والا جلسہ تاریخی ہوگا۔ ان خیالات کا اظہار پاکستان تحریک انصاف کے سینئر نائب صدر شیخ عباس رضا نے گزشتہ روز میڈیا سے گفتگو کرتے ہوئے کیا۔ انہوں نے کہا کہ کراچی کا واقعہ انتہائی افسوسناک اورشرمناک ہے ایسے واقعات سے پاکستان کا امیج جو کہ اب دنیا میں بہتر انداز میں ابھر رہا ہے کو سخت نقصان پہنچتا ہے۔ افواج پاکستان دہشت گردی کے خاتمے کیلئے بے مثال قربانیاں دے رہی ہے اوران کی جانب سے جواقدامات اٹھائے گئے ہیں اس سے ملک میں دہشت گردی کی لہر میں بہت حد تک کمی ہوئی ہے تاہم صوبوں کی لاء انفورسمنٹ ایجنسیوں کی جانب سے بعض اوقات کوتاہی کا مظاہرہ ہوتا ہے جس کی وجہ سے ایسے واقعات رونماہوتے ہیں انہوں نے مطالبہ کیا کہ سندھ حکومت اوروزارت داخلہ حکومت پاکستان فوری طور پر اس واقعے میں ملوث دہشت گردوں کو نہ صرف گرفتار کرئے بلکہ کیفر کردار تک پہنچائے۔ انہوں نے کہا کہ 15مئی کو ملتان میں
ہونے والا جلسہ ثابت کر دے گا کہ تحریک انصاف کا گراف نیچے نہیں بلکہ مزید اوپر گیا ہے اور عوام آج بھی تحریک انصاف کیساتھ مکمل طور پر وابستہ ہیں اورآئندہ الیکشن بھی تحریک انصاف کا ہوگا۔