کراچی(نیوزڈیسک)متحدہ کے قائد الطاف حسین نے پی ٹی آئی کے چیئرمین کو آخری وارننگ دیتے ہوئے کہا ہے کہ عمران خان ان کے بارے میں سنبھل کر بات کریں۔ انہوں نے کارکنوں کی خدمت نہ کرنے اور ان کی ہدایات پر عمل نہ کرنے پر رابطہ کمیٹی کے ارکان کی بھی سرزنش کی۔کراچی میں ضمنی الیکشن اور کنٹونمنٹ بورڈز میں ایم کیو ایم کی جیت کی خوشی میں جناح گرانڈ میں میوزیکل شو کا اہتمام کیا گیا۔ اس موقع پر الطاف حسین نے کہا رابطہ کمیٹی کے ارکان کی عزت انہی کی وجہ سے ہے لیکن کچھ ذمہ داران شہرت کے نشے میں دھت ہیں۔ ذمہ داروں کا یہی رویہ رہا تو وہ الطاف حسین کو کھو دیں گے۔الطاف حسین نے کہا جو ان کی رائے پر عمل نہیں کرنا چاہتا گھر چلا جائے۔ کارکنوں کا دکھ سمجھنے والا کوئی نہیں۔ انہوں نے کنور نوید کو ایک ماہ کی مہلت دیتے ہوئے کہا کارکنوں کی خدمت نہ کی تو انہیں ہٹا دیا جائیگا۔ انہوں نے مزید کہا کہ ان کی جماعت کا کوئی گورنر ہو صدر یا وزیراعظم، انہوں نے منہ پھیر لیا تو اسے کوئی سلام بھی نہیں کرے گا۔