اسلام آباد (نیوز ڈیسک)بانی پی ٹی آئی عمران خان کو اسلام آباد کے شفا اسپتال میں طبی معائنہ مکمل ہونے کے بعد دوبارہ اڈیالہ جیل منتقل کردیا گیا۔

نجی ٹی وی کے مطابق ذرائع نے بتایا کہ شفا اسپتال میں عمران خان کے مختلف طبی ٹیسٹ اور ضروری معائنے کیے گئے۔ ذرائع کے مطابق انہیں رات کے وقت سخت سیکیورٹی انتظامات کے تحت اسپتال پہنچایا گیا، جہاں طبی معائنے کے بعد جیل حکام نے انہیں واپس اڈیالہ جیل منتقل کردیا۔وفاقی وزیر اطلاعات عطا اللہ تارڑ نے اپنے بیان میں بتایا کہ سپریم کورٹ کے احکامات کی روشنی میں عمران خان کو 20 اور 21 اگست کی درمیانی شب اسپتال منتقل کیا گیا تھا۔ ان کے مطابق ماہر امراض چشم، ماہر امراض قلب اور فزیشن سمیت ماہر ڈاکٹروں پر مشتمل ٹیم نے ان کا مکمل طبی معائنہ کیا۔عطا اللہ تارڑ کا کہنا تھا کہ ڈاکٹروں نے معائنے کے بعد عمران خان کو طبی اعتبار سے صحت مند قرار دیا۔ انہوں نے بتایا کہ طبی جانچ کے تمام مراحل کے دوران عمران خان کی ہمشیرہ عظمیٰ خان بھی موجود رہیں۔

ان کے مطابق طبی کارروائی مکمل ہونے کے بعد عمران خان کو 21 اگست کی صبح تقریباً 5 بجے دوبارہ اڈیالہ جیل منتقل کردیا گیا۔ذرائع کے مطابق عمران خان کے طبی معائنے کے لیے خصوصی میڈیکل ٹیم تشکیل دی گئی تھی، جس میں ماہر امراض قلب، جنرل فزیشن اور ماہر امراض چشم شامل تھے۔ ان کی ہمشیرہ عظمیٰ خان کے علاوہ ذاتی معالج ڈاکٹر فیصل بھی اس ٹیم کا حصہ تھے۔واضح رہے کہ سپریم کورٹ نے عمران خان کو دو روز کے اندر اسپتال منتقل کرنے اور اہل خانہ کو ہفتے میں ایک مرتبہ ملاقات کی اجازت دینے کی ہدایت کی تھی۔ عدالتی حکم کے بعد عمران خان کی بہن نورین خان کو بھی اڈیالہ جیل میں ان سے ملاقات کی اجازت دی گئی تھی۔