اسلام آباد(نوز ڈیسک)انتخابی نتائج کے مطابق 38 نشستوں پر پولنگ کا عمل مکمل ہوچکا ہے، جن میں مسلم لیگ ن نے 24 نشستوں پر کامیابی حاصل کرکے واضح برتری حاصل کرلی۔

پاکستان پیپلز پارٹی 12 نشستیں جیت کر دوسری بڑی جماعت کے طور پر سامنے آئی، جبکہ عوام دوست و بازو پارٹی ایک نشست حاصل کرنے میں کامیاب رہی۔ایل اے 16 پر مسلم لیگ ن کے امیدوار میر اکبر کو نمایاں برتری حاصل ہے۔ 186 پولنگ اسٹیشنز میں سے 174 کے نتائج موصول ہوچکے ہیں جبکہ باقی 12 پولنگ اسٹیشنز کے نتائج تاحال تاخیر کا شکار ہیں۔انتخابات میں متعدد سیاسی جماعتیں کوئی نشست حاصل نہ کرسکیں۔ رپورٹ کے مطابق 24 میں سے 20 سیاسی جماعتیں ایک بھی نشست جیتنے میں ناکام رہیں، جبکہ پاکستان تحریک انصاف نے انتخابات کا مکمل بائیکاٹ کیا۔سابق وزرائے اعظم کے درمیان بھی سخت مقابلہ دیکھنے میں آیا۔ پانچ سابق وزرائے اعظم میں سے تین کو شکست ہوئی جبکہ دو اپنی نشستیں بچانے میں کامیاب رہے۔ سابق وزیراعظم چوہدری انوار الحق بھمبر سے کامیاب نہ ہوسکے، سابق وزیراعظم سردار عتیق باغ سے انتخاب ہار گئے جبکہ سابق وزیراعظم سردار تنویر الیاس نیلم اور باغ دونوں نشستوں پر شکست سے دوچار ہوئے۔

دوسری جانب راجہ فاروق حیدر اور فیصل راٹھور اپنی نشستیں جیتنے میں کامیاب رہے۔انتخابی نتائج میں آئی پی پی اور مسلم کانفرنس کے کئی اہم امیدوار بھی کامیابی حاصل نہ کرسکے۔ جماعت اسلامی، ایم کیو ایم، جموں کشمیر پیپلز پارٹی اور جمعیت علمائے اسلام (ف) بھی کوئی نشست اپنے نام کرنے میں ناکام رہیں۔