واشنگٹن(این این آئی)امریکی صدر ڈونلڈ ٹرمپ نے دھمکی دیتے ہوئے کہا ہے کہ ایران کو ایک رات میں تباہ و برباد کردیں گے ،

شاید وہ رات (آج)منگل ہو۔امریکی صدر ڈونلڈ ٹرمپ نے ایران کے ریسکیو مشن اور آبنائے ہرمز ڈیڈ لائن پر پریس کانفرنس کرتے ہوئے کہا کہ ایران میں سب سے بڑے سرچ اینڈ ریسکیو آپریشن کو کامیابی سے مکمل کیا۔ڈونلڈ ٹرمپ نے دعویٰ کیا کہ 200افراد کو صرف ایک فرد کو بچانے کیلئے بھیجا گیا، ہم نے ایسا کیا اور ہمارا ساتھ قسمت نے دیا، امریکا ایران میں اپنے اہداف حاصل کرنے میں کامیاب ہوا ہے، ایک ملک کو مکمل طور پر ختم کیا جا سکتا ہے اور وہ (آج)منگل ہوسکتا ہے۔امریکی صدر نے کہا کہ اس مشکل ریسکیو آپریشن میں ہم کسی ایک کو پیچھے نہیں رہنے دیتے، ہم نے ایران کی سرزمین سے امریکی پائلٹ کو ریسکیو کیا، کسی کے پاس ایسی ملٹری اور اسلحہ نہیں جو امریکا کے پا س ہے۔ڈونلڈ ٹرمپ نے کہا کہ کسی کے پاس ایسی ملٹری اور اسلحہ نہیں جو امریکا کے پاس ہے، ایف 15 جہاز کے طیارے سے کرنل کو بحفاظت واپس لے آئے، کرنل بری طرح متاثر تھا، ایرانی افواج بری طرح زخمی کرنل کو ڈھونڈ رہی تھی۔انہوں نے کہا کہ کرنل نے اپنے زخموں کی مرہم پٹی کی اور پہاڑ کی بلندی پر چڑھتا رہا، کرنل کی تلاش میں ہزاروں ایرانی تھے اور امریکی طیارے بھی تلاش کر رہے تھے، ایران کی سر زمین سے 48گھنٹوں میں زخمی حالت میں واپس نکالا گیا، کوئی امریکی زخمی نہیں ہوا۔امریکی صدر نے کہا کہ میں نے امریکی فوج کو پائلٹ کو ریسکیو کرنے کا حکم دیا تھا، ہم نے اپنے طیاروں کو خود تباہ کیا کیونکہ کسی دشمن کو اس نئی ٹیکنالوجی تک نہیں جانے دینا چاہتے تھے۔ڈونلڈ ٹرمپ نے کہا کہ ہمارے پاس دنیا کا بہترین جنگی ساز و سامان ہے، آپریشن میں حصہ لینے والے تمام فوجیوں کو سراہتا ہوں۔

اس سے قبل میڈیاسے گفتگومیںامریکی صدر ڈونلڈ ٹرمپ نے کہا کہ ایران کو دی گئی منگل کی ڈیڈلائن حتمی ہے، آبنائے ہرمز نہ کھلی تو ایران کا کوئی پل نہیں بچے گا۔انہوں نے کہا کہ ایران میں ہمارا آپریشن رجیم کی تبدیلی تھا، اب ایران کے پاس کچھ میزائل اور ڈرونز بچے ہیں۔انہوں نے کہاکہ ہم نے پہلی، دوسری اور تیسری رجیم تبدیل کر دی، ڈیل کے لیے امریکی تجاویز بہت اہم ہیں اور ایران کے پاس جوہری ہتھیار نہیں ہونے چاہئیں۔ڈونلڈ ٹرمپ نے کہا کہ ایران کی حمایت کرنے والے بیوقوف ہیں، امریکا اب جن لوگوں سے بات کر رہا ہے وہ سخت گیرنہیں بلکہ دانشمند ہیں، ضرورت پڑی تو ایران کے تیل پر قبضہ کریں گے۔