آدم واہن کے قریب تیز گام ایکسپریس کو حادثہ پیش آیا جس کے نتیجے میں ٹرین کی متعدد بوگیاں پٹری سے اتر کر الٹ گئیں اور کئی مسافر زخمی ہو گئے۔
ذرائع کے مطابق پشاور سے کراچی جانے والی اس ٹرین کو بہاولپور اور لودھراں کے درمیان حادثہ پیش آیا۔ بتایا جاتا ہے کہ بوگیوں کو آپس میں جوڑنے والا ہک اچانک ٹوٹ گیا، جس کے باعث ٹرین دو حصوں میں تقسیم ہو گئی۔عینی شاہدین کے مطابق انجن کے ساتھ منسلک چند بوگیاں آگے کی جانب نکل گئیں جبکہ پیچھے رہ جانے والی بوگیاں پٹری سے اتر کر الٹ گئیں، جس سے مسافروں میں خوف و ہراس پھیل گیا۔واقعے کی اطلاع ملتے ہی ریسکیو ٹیمیں، پولیس اور ضلعی انتظامیہ فوری طور پر جائے حادثہ پر پہنچ گئیں اور امدادی کارروائیاں شروع کر دیں۔ مقامی افراد بھی بڑی تعداد میں مدد کے لیے پہنچے اور مسافروں کو ڈبوں سے نکالنے میں حصہ لیا۔
چونکہ عید کے دنوں میں ٹرین میں مسافروں کی تعداد زیادہ تھی، اس لیے زخمی ہونے والوں کی تعداد بڑھنے کا خدشہ ظاہر کیا جا رہا ہے۔
