اسلام آبا د (نیوز ڈ یسک)اسلام آباد میں ایک عدالتی کارروائی میں شرکت کرنے پر حکومتِ پاکستان نے ناروے کے سفیر کو دفترِ خارجہ بلا کر اپنا احتجاج ریکارڈ کروایا۔وزارتِ خارجہ کے جاری کردہ بیان کے مطابق سفیر کو جمعرات کے روز طلب کیا گیا، جہاں ایڈیشنل فارن سیکرٹری (یورپ ڈویژن) نے عدالت میں ان کی موجودگی پر گہری تشویش کا اظہار کرتے ہوئے اسے غیر ضروری اور نامناسب اقدام قرار دیا۔ترجمان نے کہا کہ سفیر کا یہ طرزِ عمل نہ صرف سفارتی آداب کے منافی ہے بلکہ بین الاقوامی ضابطوں کی بھی خلاف ورزی کرتا ہے۔
انہیں واضح طور پر بتایا گیا کہ اس طرح کی کارروائی پاکستان کے اندرونی معاملات میں مداخلت تصور ہوتی ہے۔ سفیر کو ویانا کنونشن سمیت قائم شدہ سفارتی اصولوں کی مکمل پاسداری کی تاکید بھی کی گئی۔یاد رہے کہ ناروے کے سفیر آج سپریم کورٹ میں اُس سماعت میں موجود تھے جو ایمان مزاری کے خلاف مبینہ متنازع ٹوئٹ کیس سے متعلق تھی، اور ان کی عدالتی حاضری کی ویڈیوز سوشل میڈیا پر گردش کرتی رہیں۔
