اسلام آباد (نیوز ڈیسک) ترجمان دفتر خارجہ طاہر اندرابی نے کہا ہے کہ پاکستان نے امریکہ اور بھارت کے درمیان طے پانے والے دفاعی معاہدے پر گہری نظر رکھی ہوئی ہے اور اس کے ممکنہ اثرات کا تفصیلی جائزہ لیا جا رہا ہے۔
ترجمان دفتر خارجہ کے مطابق پاکستان کی مسلح افواج بھارتی فوجی سرگرمیوں اور مشقوں پر مکمل طور پر نظر رکھے ہوئے ہیں، اور اگر بھارت کی جانب سے کسی بھی قسم کی مہم جوئی یا جارحیت کی کوشش کی گئی تو اس کا منہ توڑ جواب دیا جائے گا۔
طاہر اندرابی نے ایک سوال کے جواب میں کہا کہ یہ استفسار کہ پاکستان نے کتنے بھارتی طیارے مار گرائے، بھارت سے ہی کیا جانا چاہیے کیونکہ حقیقت شاید بھارت کے لیے برداشت کرنا مشکل ہو۔
انہوں نے مزید کہا کہ پاکستان اور افغانستان کے درمیان تعلقات میں مثبت پیشرفت بھارت کے لیے پریشانی کا باعث بن سکتی ہے، تاہم پاکستان اپنی پالیسیوں کو کسی دوسرے ملک کی خوشنودی یا ناراضی کے تابع نہیں کرے گا۔
ترجمان دفتر خارجہ کا کہنا تھا کہ پاکستان کی خارجہ پالیسی کا محور علاقائی امن، استحکام اور باہمی احترام ہے، اور ملک اپنی سلامتی اور خودمختاری کے تحفظ کے لیے ہر ممکن اقدام جاری رکھے گا۔