کراچی(این این آئی)سعودی عرب، متحدہ عرب امارات، عراق اور ملائیشیا سے 24 گھنٹوں کے دوران 63 پاکستانیوں کو بیدخل کر دیا گیا۔امیگریشن ذرائع کے مطابق سعودی عرب سے بلیک لسٹ اور بھکاری ہونے پر 15 پاکستانیوں کو بے دخل کیا گیا ہے۔ذرائع نے بتایا کہ سعودی عرب میں زائد المیعاد قیام پر 10 پاکستانیوں کو بے دخل کر دیا گیا ہے جبکہ ممنوع تارکین وطن ہونے پر ملائیشیا سے 16 پاکستانیوں کو بے دخل کیا گیا۔

غیر قانونی داخلے اور زائد المیعاد قیام پر عراق سے 11 پاکستانی ڈی پورٹ کیے گئے ہیں، عراق سے مسافروں کو ایمرجنسی پاسپورٹ پر پاکستان بھیجا گیا۔امیگریشن حکام کا کہنا ہے کہ یو اے ای سے 4 پاکستانیوں کو بے دخل کر کے پاکستان بھیجا گیا۔حکام نے بتایا کہ کراچی ایئرپورٹ پر قانونی کارروائی کے بعد تمام بے دخل افراد کو گھروں کو روانہ کر دیا گیا ہے۔