اسلام آباد (این این آئی) پی ٹی آئی قیادت نے عمران خان سے 24نومبرکی کال واپس لینے کی درخواست کردی۔ذرائع کے مطابق بدھ کو اڈیالہ جیل میں بیرسٹر گوہر اور علی امین گنڈا پور نے بانی پی ٹی آئی سے ملاقات کی اور 24نومبر کی کال واپس لینے کی درخواست کی۔ بیرسٹرگوہرنے کہا کہ احتجاج سے ملکی معیشت کو نقصان ہوگا، حکومت سے بات کرنی چاہئے۔

انہوں نے کہاکہ جتنا کریک ڈائون ہو رہا ہے زیادہ ورکرز جمع نہیں کرسکیں گے،کریک ڈائون اور وسیع تر ملکی مفاد میں کال واپس لینی چاہئے۔ بیرسٹر گوہر نے کہ سردیوں کے باعث ورکرز کو دھرنے پر بٹھانے میں بھی مشکلات آسکتی ہیں۔بیرسٹرگوہر نے عاطف خان اور علی امین کی لڑائی کی تفصیلات سے بھی عمران خان کو آگاہ کیا۔ذرائع کے مطابق اسٹیبلشمنٹ سے درخواست کیلئے علی امین گنڈاپور کو ٹاسک دیا گیا ہے جبکہ حکومتی شخصیات سے روابط کیلئے بیرسٹرگوہر کو ٹاسک دیا گیا ہے۔