اسلام آباد(این این آئی) لندن میں سابق چیف جسٹس قاضی فائز عیسی اور پاکستانی ہائی کمیشن کی گاڑی پر حملہ، وفاقی وزیرداخلہ محسن نقوی نے افسوسناک واقعہ کی شدید الفاظ میں مذمت کی ہے۔ اپنے بیان میںوفاقی وزیر داخلہ محسن نقوی نے نادرا کو حملہ آوروں کی شناخت کے لئے فوری اقدامات کا حکم دیتے ہوئے کہا کہ فوٹیجز کے ذریعے حملہ آوروں کی نشاندہی کی جائے۔
انہوں نے کہا کہ حملہ آوروں کے خلاف قانونی کارروائی کی جائے گی۔ پاکستان میں ایف آئی آر درج کرکے مزید کارروائی کی جائے گی۔ وفاقی وزیر داخلہ نے کہا کہ حملہ آوروں کے شناختی کارڈ بلاک اور پاسپورٹ منسوخ کئے جائیں گے جنہوں نے حملہ کیا ہے ان کی شہریت منسوخ کرنے کیلئے فوری کارروائی کی جائے گی۔ وفاقی وزیرداخلہ محسن نقوی نے کہا کہ شہریت منسوخی کا کیس منظوری کے لئے کابینہ بھیجا جائے گا۔ انہوں نے واضح کیا کہ کسی کو بھی اس طرح کے حملے کی اجازت نہیں دی جا سکتی لندن میں پاکستانی ہائی کمیشن کی کار پر حملہ ہوا ہے۔ ہم اس واقعہ پر خاموش نہیں بیٹھ سکتے۔ وفاقی وزیر داخلہ محسن نقوی نے اس بات پر زور دیا کہ سابق چیف جسٹس قاضی فائز عیسی کو دھمکیوں کا سامنا تھا تو سکیورٹی کیوں فراہم نہیں کی گئی۔
