کراچی(این این آئی)پیپلزپارٹی کے رہنما منظور وسان نے پاکستان تحریک انصاف کے بانی چیئرمین عمران خان کی رہائی سے متعلق نئی پیشگوئی کرتے ہوئے کہا ہے کہ بانی پی ٹی آئی سردیوں کے بعد گرمیاں بھی جیل میں گزاریں گے۔اپنے ایک بیان میں پیپلزپارٹی کے رہنما منظور وسان نے کہاکہ 26 ویں آئینی ترمیم میں 18 ویں آئینی ترمیم کی شقیں بھی شامل ہیں، 26 ویں آئینی ترمیم سے عدلیہ اور عوام سمیت کسی کا نقصان نہیں ہے۔

انہوں نے کہا کہ بانی پی ٹی آئی عمران خان بڑی ٹربل میں ہیں، وہ سردیاں جیل میں گزارنے کے بعد گرمیاں بھی جیل میں گزاریں گے۔سابق صوبائی وزیرنے کہاکہ پیپلزپارٹی پر اسٹیبلشمینٹ کے ساتھ ہونے کا الزام غلط ہے، پیپلزپارٹی جمہوریت پسند پارٹی ہے ہم عوام کے ساتھ ہیں اور عوام کے ساتھ رہیں گے۔رہنما پیپلز پارٹی نے کہا کہ سندھ حکومت صوبے میں امن وامان قائم رکھنے میں سرگرم عمل ہے، ہم پنجاب کے علاقوں میں دریائے سندھ سے 6 نئی نہریں نکالنے کی حمایت نہیں کرتے۔منظور حسین وسان نے کہا کہ نئے تعلیمی ادارے قائم کرنے سے تعلیم پروان چڑھے گی، تعلیم دوست افراد تعلیمی ادارے کھولنے کی طرف توجہ دیں، پاکستان لا کالج کی جدید ترین عمارت دیکھ کر خوشی ہوئی، ماضی کی تاریخ بتارہی ہے کہ خیرپور قدیم دور سے شاہکار علمی و ادبی شہر رہا ہے، علاقے کے نوجوان پاکستان لاکالیج میں پڑھ کربڑے قانوندان بنیں گے۔