کراچی(این این آئی)غیر سرکاری نتائج کے مطابق پیپلزپارٹی کے مرتضیٰ وہاب میئر کراچی منتخب ہوگئے۔میئر اور ڈپٹی میئر کراچی کے انتخاب کیلئے شو آف ہینڈ کے ذریعے پولنگ کے بعد گنتی کا عمل مکمل ہوگیا۔
میئر کیلئے پیپلز پارٹی کے مرتضیٰ وہاب اور جماعت اسلامی کے حافظ نعیم الرحمن مدمقابل تھے۔غیر حتمی غیر سرکار نتائج کے مطابق پیپلزپارٹی کے امیدوار مرتضیٰ وہاب کو 173ووٹ ملے جبکہ جماعت اسلامی اور تحریک انصاف کے مشترکا امیدوار حافظ نعیم کو160ووٹ ملے۔حافظ نعیم الرحمان نے انتخابی عمل پر سوال اٹھادیئے۔ انہوںنے کہاکہ کہ فری فئیر الیکشن کیسے ہوگا جب 30منتخب بندے کہیں نہیں ہیں، ایسی اطلاع ہے کہ انہیں لاپتہ کیا گیا ہے۔انہوں نے کہاکہ ان غائب اراکین پر تشدد کی بھی اطلاعات ہیں،یہ الیکشن کمشنر کی ذمہ داری تھی کہ آپ سب کو یہاں حاضر کرواتے۔انہوں نے دعویٰ کیا کہ پیپلزپارٹی کے ہتھکنڈوں کے باوجود کامیابی ہماری ہوگی۔
