اسلام آباد (مانیٹرنگ ڈیسک) آئندہ ماہ پاکستانی قوم کو ایک پائیدار خوشخبری ملنے کا امکان ہے۔ یہ خوشخبری سندھ‘ پنجاب‘ خیبر پختونخوا‘ شمالی علاقہ جات‘ بلوچستان میں زیر زمین خدائے بزرگ و برتر کی ودیت شدہ نعمتوں کی شکل میں سامنے آنے والی ہیں۔

جنگ اخبار میں حنیف خالد کی خبر کے مطابق وسطی پنجاب کے ضلع چنیوٹ میں تقریباً اڑھائی سو ملین ٹن لوہے کے ذخائر کا ابتدائی تخمینہ ہے۔ چنیوٹ میں 25کروڑ ٹن لوہے کے ذخائر کی فزبیلیٹی رپورٹ وزیراعظم شہباز شریف کو پیش ہو گی اس خام لوہے سے پاکستان سٹیل ملز کراچی کی پیداواری صلاحیت کی حامل اسٹیٹ آف دی آرٹ دنیا کی جدید ترین نئی سٹیل ملز چنیوٹ میں لگے گی اور پچاس سال تک یہ کراچی اسٹیل ملز کے مساوی ملک و قوم کو پیداوار دے گی۔ ضلع چنیوٹ میں 70سے 80ہزار فٹ تک سات سالوں میں ڈرلنگ کے جو نمونے حاصل کئے گئے ہیں اُنہیں سوئٹزر لینڈ‘ جرمنی‘ چین وغیرہ کی اسٹیٹ آف دی آرٹ لیبارٹریز سے ٹیسٹ کروا لیا گیا ہے جس کی فزبیلٹی رپورٹ جون کے اواخر یا جولائی میں آنے کا قوی امکان ہے۔