لاہور ( آن لائن ) مسلم لیگ ( ن ) کے قائد نواز شریف کی ہدایت پر وزیراعظم کی رہائش گاہ ماڈل ٹاؤن پر اہم بیٹھک ہوئی جس میں سیاسی صورتحال اور انتخابات کے حوالے سے اہم مشاورت ہوئی۔
آئندہ انتخابات کے حوالے سے اتحادی جماعتوں کو اعتماد میں لینے اور مختلف آپشنز اور مسلم لیگ ن کی سیاسی سرگرمیاں تیز کرنے کے حوالے سے تفصیلی تبادلہ خیال کیا گیا۔ اس اجلاس میں چیف آرگنائزر مریم نواز، وزیر قانون اعظم نذیر تارڑ، وزیر داخلہ رانا ثناء اللہ اور عطاء تارڑ، ملک احمد خان اور دیگر نے شرکت کی۔وزیراعظم کی زیر صدارت پارٹی کا غیر رسمی اہم اجلاس ڈھائی گھنٹے جاری رہا ۔ اجلاس میں ن لیگ کی جانب سے بجٹ کے حوالے سے تجاویز اور تفصیلی معاملات بھی زیر غور آئے۔
اجلاس میں لیگی قائدین نے اپنی اپنی تجاویز شہباز شریف کے سامنے رکھیں۔ اجلاس میں اگلے عام انتخابات کے حوالے سے ن لیگی قیادت کے درمیان مختلف آپشنز پر غور کیا گیا۔ذرائع کے مطابق وزیراعظم نے کہا کہ ن لیگ نے ہمیشہ ون پوائنٹ ایجنڈے پر سیاست کی اور وہ ہے عوامی ایجنڈا، اگر عوام نے ہمیں دوبارہ منتخب کیا تو ملک کو ترقی و خوشحالی کی طرف گامزن کریںگے۔
وزیر اعظم نے کہا ہے کہ ن لیگ کو تمام مسائل تحریک انصاف سے ورثہ میں ملے جنہیں حل کرنے کیلئے دن رات کوشاں ہیں، ن لیگ نے ہمیشہ ون پوائنٹ ایجنڈے پر سیاست کی اور وہ ہے عوامی ایجنڈا، اگر عوام نے ہمیں دوبارہ منتخب کیا تو ملک کو ترقی و خوشحالی کی طرف گامزن کریں گے۔
