راولپنڈی(این این آئی+ آن لائن) شمالی وزیرستان میں دہشتگردوں کے خلاف آپریشن کے نتیجے میں پاک فوج کے تین جوان شہید ہوگئے، جبکہ ایل او سی پر بھارتی فائرنگ سے پاک فوج کا ایک جوان شہید ہوا، اس طرح پاک فوج کے چار جوان جام شہادت نوش کر گئے، شمالی وزیرستان میں جوابی کارروائی میں دو دہشتگرد بھی

مارے گئے۔ آئی ایس پی آر کے مطابق شمالی وزیرستان میں دہشتگردوں کیساتھ جھڑپ میں 3 جوانوں نے جام شہادت نوش کر لیا ہے۔ آئی ایس پی آر کے مطابق پاک فوج نے خفیہ اطلاعات پر آپریشن کیا اور اس دوران 2 دہشتگردبھی مارے گئے،ہلاک دہشت گرد دھماکا خیز مواد بنانے کے ماہر تھے۔آئی ایس پی آر کے مطابق دہشت گردوں کا مقابلہ کرتے ہوئے تین جوان وطن پر قربان ہوئے،شہدا میں سپاہی ازیب احمد، ضیاء السلام اور لانس نائیک عباس خان شامل ہیں۔دوسری جانب بھارتی فوج نے لائن آف کنٹرول کے نزدیکی دیوا سیکٹر میں سیز فائر کی خلاف ورزی کرتے ہوئے بلااشتعال فائرنگ کی جس کے نتیجے میں پاک فوج کا سپاہی نبیل لیاقت شہید ہو گیا۔ آئی ایس پی آر کے مطابق بھارتی فوج کی لائن آف کنٹرول پر اشتعال انگزیوں کا سلسلہ جاری ہے۔ گزشتہ روز ایل او سی کے نزدیکی دیوا سیکٹر پر بھارتی فوج کی جانب سے بلااشتعال سیز فائر کی خلاف ورزی کی گئی۔ پاک فوج نے فوری اور موثر جوابی کارروائی کی جس میں بھارتی فورسز کو بھاری جانی و مالی نقصان اٹھانا پڑا۔ فائرنگ کے تبادلے میں پاک فوج کا 28 سالہ سپاہی نبیل لیاقت شہید ہو گیا۔ نیبل لیاقت گوجر خان کا رہائشی ہے جس نے بھارتی فوج کی اشتعال انگزیوں کے خلاف وطن کی خاطر مردانہ وار مقابلہ کرتے ہوئے جان قربان کی۔