راولپنڈی (این این آئی)پاک فوج کے سربراہ جنرل قمر جاوید باجوہ نے کہا ہے کہ مسلح افواج وطن کے دفاع کیلئے ہمیشہ قوم کی توقعات پر پورا اتریں گی۔آئی ایس پی آر کی جانب سے جاری بیان کے مطابق چیف آف آرمی سٹاف جنرل قمر جاوید باجوہ
نے گوجرانوالا چھائونی اور مرالہ کا دورہ کیا اور اس موقع پر تربیتی معیار اور جنگی تیاریوں کو سراہا۔بیان کے مطابق آرمی چیف کو آپریشنل تیاریوں، تربیتی و انتظامی امور پر بریفنگ بھی دی گئی۔آرمی چیف نے گوجرانوالا اور مرالہ ہیڈ ورکس پر تربیتی مشقوں کا معائنہ کیا۔آئی ایس پی آر کے مطابق آرمی چیف جنرل قمر جاوید باجوہ نے فوجی جوانوں سے خطاب میں تربیتی معیار اور جنگی تیاریوں کو سراہا۔انہوں نے کہا کہ کہا بہترین پیشہ وارانہ صلاحیتوں کے لیے اعلی تربیتی معیار ضروری ہے، مسلح افواج مادر وطن کے دفاع کیلئے ہمیشہ قوم کی توقعات پر پورا اتریں گی۔علاوہ ازیں آرمی چیف جنرل قمر جاوید باجوہ نے سی ایم ایچ گوجرانوالا کا بھی دورہ کیا۔
