اسلام آباد(مانیٹرنگ ڈیسک)روس نے بھی بھارتی اعتراض مسترد کرتے ہوئے پاکستان کے نئے سیاسی نقشے کی حمایت کردی ۔تفصیلات کے مطابق وزیراعظم کے مشیر برائے نیشنل سکیورٹی ڈاکٹر معید یوسف نے بتایا کہ
شنگھائی تعاون تنظیم کے ممبر ممالک کے نیشنل سکیورٹی ایڈوائزرز کے آن لائن ہونے والے اجلاس میں روس کی طرف سے پاکستان کے نئے سیاسی نقشے کی حمایت کی گئی جبکہ دیگر تمام ممبران کی جانب سے پاکستان کے سیاسی نقشے پر بھارتی اعتراض کو مسترد کیا گیا۔میڈیا بریفنگ میں ڈاکٹر معید یوسف نے بتایا کہ شنگھائی تعاون تنظیم کے آن لائن اجلاس کے آغاز پر روس نے میزبان کی حیثیت سے ٹیکنیکل ٹیسٹ کیلئے کہا تاکہ بعد میں کوئی مسائل سامنے نہ آئیں، اسی دوران بھارت نے پاکستان کے سیاسی نقشے پر اعتراض کیا،تاہم تمام رکن ممالک کی طرف سے بھارتی اعتراض کو مشترکہ طور پر مسترد کیا گیا جبکہ پاکستان نمائندے کی تقریر کے دوران بھارتی سکیورٹی ایڈوائزر اجیت دوول نے بائیکاٹ کیا تاہم پاکستان کی طرف سے اپنا موقف بیان کیا گیا اور خطے میں امن و استحکام کیلئے کی جانے والی کوششوں کے بارے میں بھی بتایا۔یاد رہے کہ اقوام متحدہ کے جاری اجلاس میں مسئلہ کشمیر کو بھی سلامتی کونسل کے ایجنڈے میں شامل کرلیا گیا ہے جس سے بھارت کو عالمی سطح پر شدید شرمندگی کا سامنا ہے ۔
