اسلام آباد(مانیٹرنگ ڈیسک)نجی ٹی وی پروگرام میں گفتگو کرتے ہوئے سینئر صحافی حامد میر نے دعویٰ کیا ہے کہ سابق وزیراعظم نواز شریف صحت مند ہو چکے ہیں اور پاکستان واپس آنے کے لیے تیار ہیں۔ان کا مزید کہنا ہے کہ اسلام آباد ہائیکورٹ نے حال ہی میں اپنے فیصلے میں کہا تھا کہ سابق وزیراعظم نواز شریف کا نام ای سی ایل سے کابینہ کے فیصلے پر نکالا گیا تھا۔
اس میں عدالت کا کوئی کردار نہیں۔نواز شریف کا نام بالکل ایسے ہی ای سی ایل سے نکالا گیا جیسے 2016 میں جب نواز شریف وزیراعظم تھے تو پرویز مشرف کا نام ای سی ایل سے نکالا گیا تھا۔یہ فیصلہ سپریم کورٹ پر ڈال دیا گیا تھا لیکن ان کے فیصلے میں یہ کہیں نہیں لکھا تھا۔حامد میر نے مزید کہا کہ اس سلسلے میں کابینہ اپنے آپ کو بری الذمہ نہیں قرار دے سکتے۔تاہم مجھے یہ ضرور یاد ہے کہ نواز شریف چند ہفتوں کے لیے گئے تھے۔اب اگر وہ لندن کی سڑکوں پر چل رہے ہیں تو اس میں حکومت کو پریشان ہونے کی کیا ضرورت ہے۔یہ تو اچھی بات ہے کہ مریض صحت یاب ہو گیا ہے اور چل پھر رہا ہے۔میری اطلاعات کے مطابق مریض بھی صحت یاب ہو گیا ہے اور واپس آنے پر تیار بھی ہو گیا ہے۔حامد میر نے مزید کہا کہ اگر نواز شریف کو واپس لانا ہے تو پرویز مشرف کو بھی مت بھولیں۔پرویز مشرف بینظیر کیس میں مفرور ہیںجبکہ آئین سے غداری کے مقدمے کی تو کوئی بات ہی نہیں کر رہا۔
