پشاور (این این آئی) محسن داوڑ اور علی وزیر کی قیادت میں ایک گروہ نے شمالی وزیرستان میں خڑ کمر چیک پوسٹ پر حملہ کیا جس کے نتیجے میں پانچ فوجی زخمی ہوگئے ، فائرنگ کے تبادلے میں تین افراد جاں بحق اور دس زخمی ہوگئے ، علی وزیرسمیت آٹھ کو گرفتار کرلیاگیا ، محسن داوڑ لوگوں کو اشتعال دلانے کے بعد فرار ہوگیا ۔اتوار کو پاک فوج کے ایک بیان کے مطابق محسن جاویدداوڑ اور علی وزیر کی قیادت میں ایک گروپ نے شمالی وزیرستان کے علاقے بویہ میں خڑ کمر چیک پوسٹ پر حملہ کیا ۔ بیان کے مطابق
یہ لوگ ان مشتبہ دہشتگردوں کے سہولت کاروں کی رہائی کیلئے دبائوڈالنا چاہتے تھے جنہیں ایک دن پہلے گرفتار کیا گیا تھا۔چیک پوسٹ پر موجود فوجیوں نے اشتعال اور براہ راست فائرنگ کے باوجود انتہائی تحمل کا مظاہرہ کیا ۔ فائرنگ کے نتیجے میں پانچ فوجی زخمی ہوگئے ۔فائرنگ کے تبادلہ میں تین افراد جاں بحق اوردس افراد زخمی ہوگئے ۔تمام زخمیوں کو علاج کیلئے فوجی ہسپتال منتقل کیا گیا ۔