اسلام آباد(مانیٹرنگ ڈیسک)بھارت پاکستان کے خلاف جارحیت کا نیا منصوبہ بنانے میں مصروف، 16 سے 20 اپریل کے درمیان کارروائی کا خدشہ ہے،وزیر خارجہ شاہ محمود قریشی کا انکشاف۔ملتان میں پریس کانفرنس کرتے ہوئے انہوں نے کہا کہ وزیراعظم سے مشاورت کے بعد فیصلہ کیا کہ اس اطلاع کو عالمی برادری کے ساتھ شیئرکیا جائے اور بھارتی عزائم کو بے نقاب کریں۔شاہ محمود قریشی نے کہا کہ مودی سرکار نے سیاسی مقاصد کے لئے پورے خطے

کے امن کو داؤ پر لگا دیا ہے، جنگ کے بادل اب بھی منڈلا رہے ہیں اور ہمارے پاس مصدقہ انٹیلی جنس ہے کہ بھارت ایک اور جارحیت کا منصوبہ بنارہا ہے۔وزیر خارجہ نے کہا کہ بھارت بہانے کے طور پر مقبوضہ کشمیر میں پلوامہ جیسا واقعہ بھی کراسکتا ہے جسے بنیاد بنا کر پاکستان میں جارحیت کی جاسکتی ہے، عالمی برادری بھارت کے غیر ذمہ دارانہ رویے کا نوٹس لے۔واضح رہے کہ پلوامہ حملے کے بعد دونوں ممالک میں شدید کشیدگی پائی جاتی ہے۔