اسلام آباد(نیوز ڈیسک)وزیراعظم کی زیرصدارت وفاقی کابینہ کا خصوصی اجلاس ہوا جس میں وزراء کی کارکردگی کا جائزہ لیا گیا۔وزیراعظم عمران خان کی زیرصدارت کابینہ کا خصوصی اجلاس وزیراعظم آفس میں ہوا جس میں تمام وفاقی وزراء سمیت وفاقی سیکریٹریز نے شریک کی۔ اجلاس میں وزارتوں اورڈویڑن کوکارکردگی بیان کرنے کا موقع دیا گیا اور وزیراعظم نے
فرداً فرداً ہر وزیر کی کارکردگی کا جائزہ لیا۔ذرائع کے مطابق ہر وزارت اور ڈویژن کو بریفنگ کیلئے 10 منٹ دئیے گئے، بریفنگ کے بعد وزرا سے 5 منٹ سوالات وجوابات بھی ہوئے۔ وفاقی وزرا اپنے ہمراہ 100 روزہ کارکردگی کی رپورٹس لائے تھے۔ وزیراعظم آفس کی جانب سے کابینہ کے خصوصی اجلاس کا اعلامیہ جاری کردیا گیا جس کے مطابق اجلاس میں وزیراعظم کو سروس ڈیلیوری اور کفایت شعاری سے متعلق کیے اقدامات پر بریفنگ دی گئی اور وزیراعظم نے وزارتوں کی کارکردگی کا جائزہ لیا جب کہ وزارتوں اور ڈویژنز نے مستقبل کے منصوبوں سے متعلق وزیراعظم کو آگاہ کیا۔اعلامیہ کے مطابق وزیراعظم نے ہر تین ماہ کے بعد کابینہ اراکین کی کارکردگی کا جائزہ لینے کا فیصلہ کیا ہے، کارکردگی کا جائزہ لینے کا مقصد حکومت کی سمت کو درست رکھنا ہے جب کہ وزیراعظم نے وزارتوں اور ڈویژنوں سے 5 سالہ منصوبے بھی مانگے۔واضح رہے کہ وفاقی کابینہ کے خصوصی اجلاس میں وزرا کے قلمدان تبدیلی کی بھی افواہیں سننے میں آرہی تھیں، اجلاس میں وزیر اعظم تمام وفاقی وزراتوں، ڈویژنز اور مشیروں متعلقہ محکمے کی تین ماہ کی کارکردگی پر بریفنگ لیتے رہے۔وزیراعظم آفس میں تفصیلی بریفنگ کے بعد 5 سے 7 منٹ تک ون آن ون سوالات اور جوابات کا بھی سیشن ہوا۔ذرائع کے مطابق تمام وزارتوں اور ڈویژنز نے وزیراعظم کو آئندہ کے منصوبوں اور اقدامات بارے بھی آگاہ کیا۔ وزیر اعظم نے کابینہ کے خصوصی اجلاس کے لیے اپنی دیگر مصروفیات منسوخ کر دی تھیں۔
