اسلام آباد (آن لائن) فیڈرل بورڈ آف ریونیو (ایف بی آر) نے متحدہ عرب امارات میں 4ہزار 23جائیدادوں کا سراغ لگایا ہے جو پاکستانیوں کی ملکیت ہیں لیکن انہوں نے ان جائیدادوں کو ظاہر نہیں کیا تھا۔ حکومت کے معاشی اصلاحات کے ایجنڈا کے تحت کئے گئے اقدامات سے ایف بی آر کی جانب سے چار ہزار سے زائد جائیدادوں کی تحقیقات کی گئی ہیں جن میں سے 3ہزار 36جائیدادوں کے مالکان کے بیرون ملک دیئے گئے ایڈریسز معلوم کرنے کیلئے کام جاری ہے۔رپورٹ کے مطابق یو اے ای

میں 987جائیدادوں کی شناخت اور مالکان کی معلومات حاصل کرلی گئی ہیں۔ یہ جائیدادیں 667مالکان کی ہیں جن میں سے 46مالکان نے دعویٰ کیا ہے کہ وہ دوہری شہریت رکھتے ہیں اور بیرون ملک مقیم ہیں۔ایف بی آر کے مطابق 11جائیدادوں کے مالکان وفات پا چکے ہیں۔ ایف بی آر نے 648جائیدادوں کے مالکان کو نوٹسز جاری کر دیئے ہیں جن میں سے 553نوٹس مالکان تک پہنچائے جا چکے ہیں اور 95جائیدادوں کے مالکان کو ابھی تک نوٹسز وصول نہیں کرائے جا سکے۔