اسلام آباد(مانیٹرنگ ڈیسک)سینئرصحافی اور اینکر پرسن حامد میر نے کہا ہے کہ الیکشن 25جولائی کو ہی ہونگے ۔اگر اس سے پہلے آصف زرداری اور فریال تالپور کیخلاف ایف آئی آر درج کر کے انہیں گرفتار کیا جاتا ہے تو ایسی صورت میں پیپلز پارٹی کو ن لیگ کی طرف دھکیلنے کی کوشش ہوسکتی ہے۔ایم کیو ایم اور اے این پی بھی موجودہ صورتحال سے نالاں ہیں ۔

پروگرام کی میزبان غریدہ فاروقی کی جانب سے جب یہ سوال کیا گیا کہ پیپلز پارٹی کو ن لیگ کی طرف دکھیلنے کی کوشش ہو رہی ہے تو کیا آصف زرداری ،نوازشریف کی طرف رجوع کرسکتے ہیں ؟جواب میں حامد میر نے کہا کہ میری ذاتی طور پر آصف زرداری اور بلاول بھٹو سے بات ہوئی ہے ۔پیپلز پارٹی اور ن لیگ میں بہت فرق ہے ،آصف زرداری پہلی مرتبہ تو گرفتار نہیں ہونگے ان پر اس سے پہلے مرتضیٰ بھٹو کے قتل کی بھی ایف آئی آر درج ہو چکی ہے اور وہ انکوائری بھی بھگت چکے ہیں ،واضح رہے کہ بدعنوانی کے خلاف مہم میں نواز شریف کے خلاف مقدمے کا فیصلہ آنے کے بعد سابق صدر آصف زرداری اور ان کی بہن فریال تالپور کے گردبھی گھیرا تنگ ہونا شروع ہوگیا ہے۔ایف آئی اے نے پاکستان پیپلز پارٹی کے شریک چیئرمین آصف علی زرداری کے قریبی ساتھی اور منی لانڈرنگ کیس میں ملوث چیئرمین پاکستان اسٹاک ایکسچینج حسین لوائی کو حراست میں لے لیا ہے۔حسین لوائی پر 35ارب روپے منی لانڈرنگ کا الزام ہے۔ ایف آئی اے کے مطابق حسین لوائی نے 3 بینکوں کے 29 جعلی اکاؤنٹس کے ذریعے 35 ارب روپے کی منی لانڈرنگ کی، مذکورہ 29 اکاؤنٹس سے رقم کا لین دین اومنی گروپ کے ملازمین کرتے تھے، اومنی گروپ کے مالک انور مجید ہیں جو بیرون ملک فرار ہونے میں کامیاب ہوچکے ہیں۔

ایف آئی اے نے حسین لوائی کیخلاف مقدمے میں بڑی سیاسی اور کاروباری شخصیات کے ساتھ ساتھ آصف زرداری اور فریال تالپور کی کمپنی کا تذکرہ بھی کیا ہے۔مقدمے کے متن کے مطابق آصف زرداری اور فریال تالپورکی کمپنی بھی منی لانڈرنگ سے فائدہ اٹھانے والوں میں شامل ہے، زرداری گروپ نے ڈیڑھ کروڑ روپے کی منی لانڈرنگ کی رقم وصول کی۔مقدمے میں اومنی گروپ کے مالک انور مجید کی کمپنیوں کا بھی ذکر ہے۔

منی لانڈرنگ سے فائدہ اٹھانے والوں میں نزلی مجید، نمرہ مجید، عبدالغنی مجید شامل ہیں۔ ابتدائی طور پر 10 ملزمان کے خلاف ایف آئی آر درج کی گئی ہے، جس میں چیئرمین سمٹ بینک نصیر عبداللہ لوتھا، عبدالغنی مجید، اسلم مسعود، محمد عارف خان، نورین سلطان، کرن امان، عدیل شاہ راشدی، طحہ رضا نامزد ملزمان ہیں۔منی لانڈرنگ سے فائدہ اٹھانے والی کمپنیوں اور افراد کو سمن جاری کرتے ہوئے وضاحت طلب کرلی گئی ہے۔ ایف آئی اے نے 29 اکاؤنٹس کی تمام تفصیلات عدالت میں پیش کردی ہیں، جس کے مطابق 6 مارچ 2014 سے 12 جنوری 2015 تک اربوں روپے کی منی لانڈرنگ کی گئی۔

موضوعات:حامد میر